१० लाखांच्या चिल्लरचे वाटप

म. टा. प्रतिनिधी, जळगाव

येथील एकता रिटेल किराणा मर्चंट सहकारी पतसंस्थेत सोमवारी (दि. २७) चिल्लर मेळा झाला. पतसंस्थेचे अध्यक्ष ललित बरडिया, इंडियन रेडक्रॉस सोसायटीचे उपाध्यक्ष गनी मेमन, बच्चनकुमार चावला आणि पतसंस्थेच्या सीईओ प्रणिता कोलते यांच्या हस्ते संस्थेच्या नवीपेठेतील कार्यालयात सुमारे १० लाख रुपयांची चिल्लर वाटप करण्यात आली. प्रत्येकाला ५ हजार रुपयांची चिल्लर देण्यात आली. त्यात १, २, ५ आणि १० रुपयांच्या डॉलरचा समावेश होता. यावेळी गनी मेमन यांनी लोकांच्या गरजा ओळखून ही पतसंस्था काम करते, असे सांगितले. गेल्या ३ वर्षांपासून पतसंस्था चिल्लर वाटप करीत असून हा जवळपास २५ वा कार्यक्रम आहे. आतापर्यंत लोकांना २ कोटी रुपयांवर चिल्लरचे वाटप झालेले आहे. मेळाव्यास मोठ्या संख्येने नागरिक उपस्थित होते.