११८३ लाभार्थ्यांवर गुन्हे दाखल करणार

म. टा. प्रतिनिधी, जळगाव

स्वच्छ महाराष्ट्र अभियानांतर्गत वैयक्तिक शौचालय बांधकामासाठी अनुदान घेऊन अद्यापपर्यंत बांधकाम न करणार्‍या ११८३ लाभार्थ्यांवर गुन्हे दाखल करण्याचा इशारा उपायुक्त चंद्रकांत खोसे यांनी दिला आहे. दरम्यान, ज्या नागरिकांना वैयक्तिक शौचालयासाठी अनुदान पाहिजे असेल त्यांनी अर्ज करावे, असे आवाहनदेखील करण्यात आले आहे.

शहर हागणदारीमुक्त करण्यासाठी स्वच्छ महाराष्ट्र अभियानांतर्गत ज्यांच्याकडे वैयक्तिक शौचालय नाही. परंतु, जागा असेल अशा कुटुंबीयांना शासनातर्फे १२ हजारांचे तर महापालिकेकडे ५ हजार असे १७ हजारांचे अनुदान दिले जाते. वैयक्तिक शौचालयासाठी महापालिकेने सर्वेक्षण केल्यानंतर ९,९२२ वैयक्तिक शौचालय बांधकामाचे उद्दिष्ट आहे.

त्यापैकी ६,९८० लाभार्थ्यांना पहिल्या टप्प्यात अनुदान दिले आहे. ३,७७९ शौचालयांचे बांधकाम पूर्ण झाले असून, २०१८ शौचालयांचे बांधकाम सुरू आहे. तर १,१८३ लाभार्थ्यांनी पहिल्या टप्प्यातील अनुदान घेऊन सुद्धा बांधकाम न केल्यामुळे संबंधितांना नोटीस बजावण्यात येणार आहे. नोटीस बजावल्या नंतरही काम न सुरू केल्यास संबंधितांविरुद्ध गुन्हे दाखल करण्यात येणार असल्याचे उपायुक्त चंद्रकांत खोसे यांनी सांगितले.