कुणी घर देता का घर?

धुळ्यात पुनर्वसनासाठी धडक मोर्चा

म. टा. वृत्तसेवा, धुळे

शहरातील रेल्वे स्टेशन रोडवरील काही दिवसांपूर्वी झालेल्या अतिक्रमण निर्मूलनाच्या कारवाईनंतर स्टेशन रोडवरील किमान शंभराहून अधिक कुटुंबीयांचा संसार अद्यापही उघड्यावर पडला आहे. सोमवारी (दि. ३०) या विस्थापितांसाठी हक्काचे घर मिळावे यासाठी हजारोंच्या संख्येने स्टेशन रोड परिसरातून महापालिकेवर मोर्चा काढून आयुक्त सुधारक देशमुख यांना निवेदन देण्यात आले.

शहरात गेल्या काही वर्षांपासून स्टेशन रोडवरील फाशी पूल ते दसेरा मैदानापर्यंत रोडला लागून २४४ अतिक्रमणे गेल्या आठवड्यात काढण्यात आली. यात २२२ घरांचा समावेश होता तर उर्वरित तात्पुरता व्यवसाय थाटलेल्या व्यावसायिकांचे बांधकाम होते. त्यामुळे या अतिक्रमणात घरे गेलेल्या सर्व कुटुंबांना मनपा प्रशासनाकडून पुनर्वसनाची सोय करून द्यावी यासाठी शहरातून हजारोंच्या संख्येने मोर्चा काढण्यात आला. मोर्चेकरांनी धुळे मनपाबाहेर प्रशासनाच्या विरोधात जोरदार घोषणाबाजी करीत जोपर्यंत आम्हाला हक्काची घरे मिळत नाही तोपर्यंत स्टेशन रोडवरील जागेतच उदरनिर्वाह सुरू ठेवण्याचा इशारा दिला आहे. आपल्या मुला-बाळांसह कुडकुडत्या थंडीत दि. २६ ऑक्टोबरपासून ही सर्व कुटूंब आपला उदरनिर्वाह करीत आहेत. याबाबत संताप व्यक्त करीत जोपर्यंत प्रशासनाकडून पुनर्वसनाचा प्रश्न सुटत नाही तोपर्यंत स्टेशन रोड परिसर न सोडण्याचा निर्धारही केला आहे.

उघड्यावरच काढले चार दिवस

गेल्या आठवड्यात सकाळी २२२ नागरिकांनी घरे जमीनदोस्त करण्यात आली आणि पुनर्वसनाचा प्रश्न सुटेपर्यंत तेथेच थांबण्याचा निर्धार केला आहे. घरातील संसारोपयोगी साहित्य रस्त्याच्या बाजूला ठेवण्यात आले आहे. तर काही कुटुंबांनी आपले साहित्य रेल्वे स्टेशनकडील भागात ठेवले आहे. मातीच्या ढिगाऱ्यात आणि धुळीत दोन-तीन दिवस काढले मात्र आता चार दिवस झाल्यानंतरही हीच परिस्थिती आहे. त्यामुळे ही सर्व कुटुंबे संतप्त झाले असून, पुनर्वसन कधी होणार याकडे त्यांच्या नजरा लागल्या आहेत.