वाहन तपासणीत २२५ स्कूल बस दोषी

म. टा. प्रतिनिधी, जळगाव

उपप्रादेशिक परिवहन कार्यालयाच्यावतीने बुधवारी (दि. २६) घेण्यात आलेल्या तपासणी मोहिमेत २२५ वाहने दोषी आढळून आली आहेत. यानंतर एकूण २२ वाहनांचा नोंदणी परवाना निलंबित करण्यात आला. त्याचबरोबर २२ वाहन चालकांची अनुज्ञाप्ती निलंबित करण्यात आली असून, दोषी वाहनचालकांकडून करापोटी ४२ हजार ६८४ रुपयांची वसूली करण्यात आल्याची माहिती उपप्रादेशिक परिवहन अधिकारी जयंतकुमार पाटील यांनी एका प्रसिद्धी पत्रकान्वये दिली आहे.

पोलिस अधीक्षक कार्यालयातील प्रेरणा सभागृहात अप्पर पोलिस अधीक्षक बच्चनसिंह यांच्या अध्यक्षतेखाली जिल्हा स्कूलबस समितीची बैठक पार पडली. या बैठकीस जिल्ह्यातील पोलिस, वाहतूक, परिवहन, शिक्षण, एस. टी. महामंडळ या सर्व विभागांचे अधिकारी उपस्थित होते.

या बैठकीत प्रत्येक शाळेतील मुख्याध्यापक, प्राचार्य यांनी त्यांच्या शाळेतील विद्यार्थ्यांची ने-आण करणाऱ्या स्कूल बसेसच्या वाहन चालकांचे चारित्र्य पडताळणी करून घेणे आवश्यक आहे. वाहन चालकांची, स्कूलबसमध्ये असलेल्या मदतनीस यांची सविस्तर माहिती शाळेत संग्रहित करून ठेवावी. शाळेच्या वाहनात सीसीटीव्ही कॅमेरे बसविण्यात यावे, शाळेतील परिवहन समितीने संबंधित पोलिस स्टेशन, पोलिस अधीक्षक कार्यालय, परिवहन विभागांचे दूरध्वनी क्रमांक घेऊन संपर्कात राहण्याच्या सूचना स्कूलबस मालक, चालक यांना यावेळी देण्यात आल्या.

उपप्रादेशिक परिवहन कार्यालयामार्फत १ एप्रिल २०१६ ते ३० जून, २०१७ या कालावधीत स्कूलबस वाहनांच्या तपासणीत एकूण २२५ दोषी वाहने आढळून आली आहे. त्यांच्यावर मोटार वाहन कायद्यानुसार कारवाई करण्यात येऊन न्यायालयीन दंड १६ हजार रुपये, कार्यालयीन सहमत शुल्क २३ हजार ८०० रुपये तर करापोटी २ हजार ८८४ असे एकूण ४२ हजार ६८४ रुपये वसूल करण्यात आले आहे, अशी माहिती उपप्रादेशिक परिवहन अधिकारी जयंतकुमार पाटील यांनी बैठकीत दिली.