दिवाळीनिमित्त धावणार चोवीस विशेष रेल्वे

३ ते १७ नोव्हेंबरपर्यंत घेता येणार फायदा

म. टा. प्रतिनिधी, जळगाव

दिवाळीनिमित्त मध्य रेल्वेद्वारे लोकमान्य टिळक टर्मिनस-गोरखपूर, छत्रपती शिवाजी महाराज टर्मिनस-जम्मूतावी / लखनौ दरम्यान चोवीस विशेष रेल्वे गाड्या चालविण्याचा निर्णय घेण्यात आला आहे. या सर्व गाड्या भुसावळ रेल्वे विभागातून धावणार असल्याची माहितीही या वेळी देण्यात आली आहे.

लोकमान्य टिळक टर्मिनस-गोरखपूर साप्ताहिक विशेष गाडी दि. ३ ते १७ नोव्हेंबरपर्यंत प्रत्येक शनिवारी मध्यरात्री पाऊण वाजेला लोकमान्य टिळक टर्मिनसहून सुटेल. दुसऱ्या दिवशी ही रेल्वे ११.३५ वाजेला गोरखपूर पोहोचेल. हीच विशेष गाडी परतीच्या प्रवासाला दि. ४ ते १८ नोव्हेंबरपर्यंत प्रत्येक रविवारी दुपारी दोन वाजेला गोरखपूरहून निघेल. तिसऱ्या दिवशी ००.३५ वाजता लोकमान्य टिळक टर्मिनसला पोहोचेल. ही गाडी मार्गात कल्याण, इगतपुरी, नाशिक रोड, भुसावळ, इटारसी, जबलपूर, कटनी, सतना, मानिकपूर, छियोंकी, वाराणसी, मऊ, भटनी व देवरिया सदर या स्थानकावर थांबेल.

लोकमान्य टिळक टर्मिनस-मंडूआडीह ही साप्ताहिक विशेष गाडी दि. ७ ते २१ नोव्हेंबरपर्यंत प्रत्येक बुधवारी मध्यरात्री पाऊण वाजता लोकमान्य टिळक टर्मिनसहून निघेल. दुसऱ्या दिवशी ४.४५ वाजता मंडूआडीहला पोहोचेल. ही गाडी परतीच्या प्रवासाला दि. ८ ते २२ नोव्हेंबरदरम्यान प्रत्येक गुरुवारी दुपारी दोनला मंडूआडीहहून निघेल. ही गाडी कल्याण, इगतपुरी, नाशिक रोड, भुसावळ, इटारसी, जबलपूर, कटनी, सतना, मानिकपूर, छियोंकी, वाराणसी, मऊ, भटनी, तथा देवरिया सदर येथे थांबेल.


यानंतर छत्रपती शिवाजी महाराज टर्मिनस-जम्मू तावी एसी सुपरफास्ट ही गाडी २ ते १६ नोव्हेंबरपर्यंत प्रत्येक शुक्रवारी ०६.४५ वाजता छत्रपती शिवाजी महाराज टर्मिनसहून सुटेल आणि दुसऱ्या दिवशी रात्री आठ वाजेला जम्मू तावी येथे पोहोचेल. या गाडीला दादर, कल्याण, इगतपुरी, नाशिक रोड, भुसावळ, इटारसी, भोपाल, झॉंसी, आगरा कैंट, दिल्ली सफदरगंज, अंबाला कैंट, लुधियाना, जालंधर कैंट, पठाणकोट कैंट येथे थांबा दिला आहे. जम्मूतावी- छत्रपती शिवाजी महाराज टर्मिनस ही गाडी ४ ते १८ नोव्हेंबरदरम्यान प्रत्येक रविवारी सकाळी सात वाजता जम्मूहून सुटेल. छत्रपती शिवाजी महाराज टर्मिनस-लखनौ एसी सुपरफास्ट ही गाडी दि. ६ ते २० नोव्हेंबरदरम्यान प्रत्येक मंगळवारी दुपारी २.२० वाजता छत्रपती शिवाजी महाराज टर्मिनसहून सुटेल. यासर्व विशेष रेल्वेंचा त्या-त्या स्थानकावरील प्रवाशांना फायदा होणार आहे.