​ २५ कोटींचा निधी पुन्हा मनपाकडे

मुंबईत झालेल्या बैठकीत पालकमंत्र्यांची सूचना

म. टा. प्रतिनिधी, जळगाव

महापालिकेच्या विविध प्रलंबित प्रश्नांबाबत पालकमंत्री चंद्रकांत पाटील यांच्या अध्यक्षतेखाली मुंबईत बैठक झाली. यावेळी २५ कोटींचा निधी मनपाकडे वर्ग करून आमदार सुरेश भोळे आणि महापौर ललित कोल्हे यांनी समन्वयाने विकासकामांची यादी तयार करावी, अशी सूचना पालकमंत्र्यांनी दिल्याची माहिती महापौरांनी दिली.

तत्कालिन जळगाव नगरपालिकेने घरकुलसह विविध योजनांसाठी हुडकोकडून कर्ज घेतले होते. या कर्जाचा प्रश्न निकाली काढण्यासाठी महिनाअखेरीस तोडगा काढण्यात येईल. तसेच मनपातील रिक्त पदेही येत्या आठ दिवसांत भरण्यात येतील, असे पालकमंत्र्यांनी सांगितले. मेहरूण तलावाच्या विकासाबाबत यावेळी चर्चा झाली.

जळगावातील सुप्रीम कॉलनी व वाघनगर परिसरासाठी पाणीपुरवठा योजनेचा प्रस्ताव सादर केल्यास सरकारकडून निधी उपलब्ध करून देण्यात येईल. तसेच अमृत योजनेंतर्गत पाणीपुरवठा व मलनिस्सारण योजनेचे कार्यादेश त्वरित देऊन कामे लवकरात लवकर पूर्ण करण्याची सूचनाही देण्यात आली.

दरम्यान ४ कोटी ९८ लाखांचा निधी पालकमंत्र्यांनी मंजूर केल्याची माहितीही महापौर कोल्हे यांनी दिली. तर पालघर येथील प्रशांत पाटील यांची मनपा अतिरिक्त आयुक्तपदी नियुक्ती केली असल्याचे विश्वसनीय वृत्त आहे.