जिनिंगमधील आगीत ४० लाखांचा कापूस खाक

आव्हाणे शिवारातील घटना

म. टा. प्रतिनिधी, जळगाव

आव्हाणे रस्त्यावरील लक्ष्मी जिनिंगमध्ये असलेल्या कापसाला बुधवारी (दि. २६) दुपारी १ वाजता अचानक आग लागली. या आगीत १२ क्विंटल कापूस जळाला असून, अंदाजे ४० ते ४५ लाखांचे नुकसान झाल्याचे व्यक्त केला जात आहे. आग विझविण्यासाठी अग्निशामक दलाने शर्थीचे प्रयत्न केले. त्यासाठी दोन अग्निशामक दलाच्या गाड्यांनी तब्बल दोन तासांत आगीवर नियंत्रण मिळविले.

आव्हाने रस्त्यावरील लक्ष्मी जिनिंग ही राजेश ट्रेडिंग कंपनीने भाडे तत्त्वावर लक्ष्मण गंगाराम पाटील यांना चालविण्यासाठी दिली आहे. त्यामुळे राजेश ट्रेडिंग कंपनीचे मालक साहेबराव पाटील यांच्या कापसाच्या गाठी जिनिंगमध्ये नेहमीच येत असतात. बुधवारीदेखील कंपनीचा कापूस लक्ष्मी जिनिंगमध्ये पडून होता. दुपारी उज्ज्वल सोनवणे हा चालक ट्रॅक्टरने कापूस मशिनीत भरत होता. त्यावेळी दुपारी १ वाजता उज्ज्वल याला कापसाच्या ढिगाऱ्यातील एका कोपऱ्यात आग लागल्याचे दिसले. त्याने आरडाओरड करत आग लागल्याचे कर्मचाऱ्यांना सांगितले. हे ऐकू येताच अकाऊंटंट इंदर तिवारी यांच्यासह परिसरातील कामगारांनी लागलीच आग विझविण्यासाठी पाण्याचा मारा करीत आग विझविण्याचा प्रयत्न केला. इंदर तिवारी यांनी तात्काळ मनपा अग्निशमन दलाला आगीची माहिती दिली. पंधरा ते वीस मिनिटानंतर अग्निशमन बंब घटनास्थळी आल्यानंतर जळत्या कापसावर अग्निशमन कर्मचाऱ्यांनी त्याच्यावर जोरदार पाण्याचा मारा केला. मात्र, तोपर्यंत या आगीत सुमारे १२०० क्विंटल कापूस जळून खाक झाला होता.