रोजगार मेळाव्यात ४५ उमेदवारांना कॉल लेटर

महाराष्ट्रासह गुजरातमधील कंपन्यांचा समावेश

म. टा. प्रतिनिधी, जळगाव

जळगाव शहर महानगरपालिका राष्ट्रीय नागरी उपजीविका अभियान व जिल्हा कौशल्य विकास रोजगार उद्योजकता विभाग यांच्या संयुक्त विद्यमाने शुक्रवारी (दि. ४) कौशल्य विकास व रोजगार मेळाव्याचे आयोजन करण्यात आले होते. या मेळाव्यात ४८० उमेदवारांनी सहभाग नोंदविला.

मेळाव्यात सहभाग घेतलेल्या ४८० उमेदवारांपैकी ४५ उमेदवारांना जॉब लेटर देण्यात आले आणि २५७ विद्यार्थ्यांची अंतिम मुलाखतीसाठी निवड करण्यात आली. या मेळाव्यासाठी महाराष्ट्रासह गुजरात राज्यातील कंपन्यांमधून मुलाखतीसाठी प्रतिनिधी आले होते.

तब्बल ७६५ जागांसाठी हा मेळावा घेण्यात आला असून या मेळाव्यात तरुणांसह तरुणींचीदेखील गर्दी केली होती. या मेळाव्यातून जॉब मिळावा ही आशा सहभागी तरुणाईंच्या चेहऱ्यांवरून दिसून येत होती. बालगंधर्व सभागृहात आयोजित करण्यात आलेल्या या मेळाव्याचे उद्घाटनाप्रसंगी अध्यक्षस्थानी मनपा सभापती वर्षा खडके तसेच उपायुक्त लक्ष्मीकांत कहार, प्रभाकर हरडे, कौशल्य विकास अधिकारी ए. आर. खैरनार, शहर व्यवस्थापक संदीप भोसले, एस. बी. पाटील उपस्थित होते. या मेळाव्याकरीता १८ ते २५ वर्ष वयोगटातील तरुण तरुणींनी सहभाग नोंदविला होता.