जळगाव जिल्ह्यात ६० टक्के मतदान

जळगाव:

जळगाव जिल्ह्यातील जळगाव व रावेर लोकसभा मतदारसंघात मंगळवारी (दि. २३) सकाळी ७ ते सायंकाळी ६ वाजेदरम्यान मतदान झाले. रात्री उशिरापर्यंत मतदारांच्या रांगा लागल्याने मतदानाची टक्केवारी ही जळगाव मतदारसंघात ५८ तर रावेर लोकसभा मतदासंघात ६२ टक्के आहे. जिल्ह्यात सरासरी ६० टक्के मतदान झाले.

जिल्ह्यातील जळगाव व रावेर मतदारसंघासाठी मंगळवारी (दि. २३) मतदान झाले. जळगाव व रावेर मतदारसंघासाठी लोकसभा निवडणूकीच्या मतदानासाठी जिल्ह्यातील २,१११ ठिकाणी ३,६१७ मतदान केंद्रांवर मतदान घेण्यात आले. जळगाव मतदारसंघात भाजप-शिवसेना युतीचे उमेदावर आमदार उन्मेष पाटील व काँग्रेस-राष्ट्रवादीचे उमेदवार माजी पालकमंत्री गुलाबराव देवकर यांच्यात प्रमुख लढत होती. तर रावेर मतदारसंघात भाजप-शिवसेना युतीच्या उमेदवार खासदार रक्षा खडसे तर काँग्रेस-राष्ट्रवादीचे उमेदवार डॉ. उल्हास पाटील यांच्यात लढत झाली.

सर्वच उमेदवारांकडून विजयाचा दावा
निवडणुकीच्या रिंगणातील जळगाव मतदारसंघातील भाजप-शिवसेना युतीचे उमेदवार आमदार उन्मेष पाटील, काँग्रेस-राष्ट्रवादीचे उमेदवार गुलाबराव देवकर तसेच रावेर मतदारसंघातील भाजप-शिवसेना युतीच्या उमेदवार खासदार रक्षा खडसे आणि काँग्रेस-राष्ट्रवादीचे उमेदवार डॉ. उल्हास पाटील यांच्यासह त्यांच्या पक्षांनी आपापल्या विजयाचा दावा केला आहे. दरम्यान, दि. २३ मे रोजी होणाऱ्या मतमोजणीत चित्र स्पष्ट होणार आहे.