‘आषाढी’साठी एसटीच्या ७५ जादा गाड्या

स्वतंत्र बसचीही सुविधा; रेल्वेकडून विशेष गाड्या

म. टा. प्रतिनिधी, जळगाव

आषाढी एकादशीनिमित्त पंढरपुरला जाण्यासाठी यंदा राज्य परिवहन महामंडळातर्फे जळगाव विभागातून ७५ जादा बसेस सोडण्यात येणार आहे, अशी माहिती एसटी विभागाकडून देण्यात आली आहे.

आषाढी एकादशी दि. १९ जुलै रोजी आहे. विठ्ठलाच्या दर्शनासाठी पंचक्रोशीतून भाविक पंढरपुरात दाखल होत असतात. यंदादेखील राज्य परिवहन महामंडळातर्फे भाविकांना पंढरपुरला जाण्यासाठी दि. १८ रोजीपासून ७५ जादा बसेसची व्यवस्था करण्यात आली आहे. तसेच पंढरपुरला जाण्यासाठी भाविकांना आपले तिकीट आरक्षित करण्यासाठी आरक्षण सुविधादेखील सुरू करण्यात आली आहे. त्याचप्रमाणे जादा बसेस या जळगाव विभागातील जळगाव, यावल, चाळीसगाव, अमळनेर, चोपडा, जामनेर, रावेर, मुक्ताईनगर, पाचोरा, भुसावळ व एरंडोल या आगारातून सुटणार आहेत.

भाडेवाढीचा परिणाम
श्री तीर्थश्रेत्र पंढरपुरला जाण्यासाठी ग्रुप किंवा समूहाला थेट गावाहून पंढरपूर जाण्याची व्यवस्था करण्यात आली आहे. यामध्ये भाविकांना दर्शन घेऊन परतीच्या प्रवासाला निघायचे असल्यास त्यांना त्या तारखेचे तिकीट काढून त्यांना परतीच्या बसची स्वतंत्र व्यवस्थादेखील करून देण्यात आली आहे. तसेच प्रवाशांना पंढरपुरला येण्याजाण्यासाठी दोन्हींकडून आरक्षण सुविधादेखील सुरू करण्यात आली आहे. तसेच स्वतंत्र बससाठी संबंधित आगारप्रमुखांशी संपर्क साधण्याचे आवाहन महामंडळातर्फे करण्यात आले आहे. नुकतीच एसटीच्या भाड्यात १८ टक्के वाढ झाल्याने या भाडेवाढीचा परिणाम यंदा पंढरपूरसाठी सोडण्यात येणाऱ्या बसेसवरदेखील होण्याची शक्यता वर्तविण्यात येत आहे.

रेल्वेची सेवा उपलब्ध
खान्देशातून तसेच विदर्भातून पंढरपुरला आषाढी एकादशीला जाणा­ऱ्या भाविकांची प्रचंड गर्दी असते. भाविकांच्या सोयीसाठी रेल्वे प्रशासनाने अमरावती- पंढरपूर व खामगाव-पंढरपूर अशा दोन विशेष रेल्वे गाड्यांचे नियोजन केले आहे. गाडी क्र. ०११५५ अमरावती-पंढरपूर ही गाडी दि. १८ आणि २० जुलै रोजी दुपारी २ वाजेला पंढरपूरकडे रवाना होईल ही गाडी तिच्या मार्गात न्यू अमरावती, बडनेरा, मुर्तिजापूर, अकोला, शेहेगाव, जलंब, नांदुरा, मलकापूर, बोदवड, भुसावळ, जळगाव, पाचोरा, चाळीसगाव, नांदगाव, मनमाड, कोपरगाव, बेलापूर, अहमदनगर, दौंड, भीगवान, जेऊर, पंढरपूर या रेल्वे स्थानकांवर थांबणार आहे. तर गाडी क्र.०११५६ पंढरपूर-अमरावती ही गाडी याचा मार्गाने दि. १८ व २४ जुलै रोजी सायंकाळी ५.१० वाजता न्यू अमरावतीकडे रवाना होईल. तर गाडी क्र. ०११५३ खामगाव-पंढरपूर ही गाडी १८ व २१ जुलै रोजी पंढरपूरकडे रवाना होईल. तर गाडी क्र. ०११५४ पंढरपूर-खामगाव ही गाडी दि. १९ व २५ जुलै रोजी पंढरपूरहून खामगावकडे रवाना होईल.