ऐंशी कोटींची उलाढाल ठप्प

गाळेधारकांच्या बंदचा फटका

म. टा. प्रतिनिधी, जळगाव

मनपाच्या गाळेधारकांच्या बंदमुळे तसेच त्यांना पाठिंबा म्हणून शहरात विविध व्यापारी संघटनांनी पाठिंबा देत मंगळवारी (दि. २०) दुपारी १ वाजेपर्यंत दुकाने बंद ठेवले. तर फुले मार्केटसह २० मार्केट बेमुदत बंद आहेत. यामुळे एका दिवसांत सुमारे ८० कोटी रुपयांची उलाढाल ठप्प झाल्याची माहिती व्यापाऱ्यांनी दिली आहे.

जळगावतून जिल्ह्यासह खान्देश, मराठवाडा, विदर्भ या भागात मोठ्या प्रमाणात किराणा व इतर माल जात असतो. त्यासाठी येथे दररोज या भागांमधून वाहने माल खरेदीसाठी येत असतात. त्यानुसार मंगळवारीदेखील अनेक वाहनधारक आले. मात्र दुपारी एक वाजेपर्यंत दुकाने बंद असल्याने बाहेर गावाहून आलेल्या ग्राहकांना दुपारपर्यंत प्रतीक्षा करावी लागली. दुसरीकडे गाळेधारकांच्या बंदमुळे बराच माल मिळू न शकल्याने काही जणांना रिकाम्या हाती परतावे लागले. याचा परिणाम होऊन जवळपास कोट्यवधींची उलाढाल ठप्प झाली होती.

लग्नसराईची खरेदी बारगळली
जळगावात कापड व्यवसाय मोठा आहे. लग्नसराई सुरू असल्याने बस्त्यासाठी दररोज मोठ्या प्रमाणात वधू-वरांचे नातेवाईक जळगावात येत आहेत. मंगळवारी (दि. २०) तर महात्मा फुले मार्केट, सेंट्रल फुले मार्केट व इतर कापड मार्केट बंद असल्याने खरेदीसाठी आलेल्या वऱ्हाड्यांची फिरफिर झाली. शहरातील सतत गजबजणारे फुले मार्केट, गोलाणी मार्केट, जुने बी. जे. मार्केटसह इतरही ठिकाणी आजच्या बंदमुळे सर्वत्र शुकशुकाट पसरला होता. ‘जनतेस आवाहन....’ असे मोठमोठे फलक लावण्यात आलेले होते.