गैरहजर १२६ कर्मचाऱ्यांवर गुन्हे?

२७२१ कर्मचाऱ्यांनी घेतले मतदानयंत्र हाताळणीचे धडे

म. टा. प्रतिनिधी, जळगाव

महानगरपालिका निवडणुकीसाठी नियुक्त करण्यात आलेल्या २७२१ अधिकारी व कर्मचाऱ्यांना गुरुवारी बंदिस्त नाट्यगृहात प्रात्याक्षिकासह मतदानयंत्र हाताळणीचे धडे देण्यात आले. या प्रशिक्षणाला १२६ कर्मचारी गैरहजर होते. त्यांच्यावर गुन्हे दाखल करणार असल्याचा इशारा आयुक्त चंद्रकांत डांगे यांनी दिला आहे.

महानगरपालिकेच्या निवडणुकीसाठी दि. १ ऑगस्ट रोजी मतदान तर ३ ऑगस्टला मतमोजणी होणार आहे. निवडणूक प्रक्रियेसाठी जिल्हाभरातील शासकीय कार्यालयासह शाळा, महाविद्यालय यातील २८४७ कर्मचाऱ्यांची नियुक्ती केली आहे. या नियुक्त केलेल्या कर्मचाऱ्यांना दोन टप्प्यांत प्रशिक्षण देण्यात येत आहे. यातील प्रशिक्षणाचा पहिला टप्पा नवीन नाट्यगृहाच्या सभागृहात गुरुवारी पार पडला. २७८७ कर्मचारी व ६० क्षेत्रीय अधिकारी असे एकूण २८४७ कर्मचारी, अधिकारी नियुक्त केले आहेत. त्यापैकी २७२१ कर्मचारी व अधिकारी प्रशिक्षणासाठी हजर होते. सकाळी ९, दुपारी १२ आणि दुपारी ३ वाजता असे टप्प्याटप्प्याने प्रशिक्षण दिले गेले. निवडणूक निर्णय अधिकारी संजय गायकवाड, विजयानंद शर्मा, राजेंद्र कचरे आणि अमोल निकम यांनी प्रात्यक्षिक सत्रात मतदानयंत्राची हाताळणी कशी करावी, सिल कसे करावे, मशिनची जोडणी कशी करावी याबाबत प्रात्यक्षिक दिले. तर माहितीच्या सत्रात मतदान केंद्र अध्यक्ष आणि मतदान अधिकारी यांच्या जबाबदारीबाबत मार्गदर्शन करण्यात आले.

शिक्षक गैरहजर
बारावीची फेरपरीक्षा सुरू झाली आहे. निवडणूक प्रक्रियेसाठी बहुतांश शिक्षकांची नियुक्ती करण्यात आली आहे. परंतु, परीक्षा असल्यामुळे नियुक्त केलेले शिक्षक प्रशिक्षणासाठी हजर राहू शकले नाही.