‘सर्व पंथांचे संत पूजनीयच’

म. टा. प्रतिनिधी, जळगाव

संत अथवा गुरूंचे आपल्या जीवनात अनन्यसाधारण महत्त्व आहे. चांगले गुरू मिळाले, तर आपल्या आत्म्याचे कल्याण होते. हे कल्याणकारी कार्य संत आणि गुरू करीत असतात. संत कोणत्याही पंथाचे असोत ते पूजनीयच असतात, असे मौलिक विचार राष्ट्रसंत कमलमुनी कमलेश यांनी वावडदा येथे व्यक्त केले.

वावडदा येथे संघपती दलीचंद जैन यांच्या उपस्थितीत राष्ट्रसंत कमलमुनी कमलेश यांची सभा पार पडली. याप्रसंगी संत, गुरूंच्या महतीबाबत त्यांनी उपस्थितांना मार्गदर्शन केले. अर्धवट डॉक्टराने इलाज केला की, आपल्याला धोका निर्माण होतो. जे गुरू स्वतःच्या आत्म्याचा उद्धार करू शकत नाहीत, ज्यांच्यात लोभ, तृष्णा आणि स्वार्थ भरलेला आहे, अशा संत आणि गुरूंपासून चार हात दूर बरे, असे ते म्हणाले. लोभी गुरू दगडाने भरलेल्या जहाजासारखा असतो. ते स्वतःही बुडतात व दुसऱ्यालाही बुडवतात. या उलट वैराग्य ही साधनांची प्रतिमूर्ती असल्याचे त्यांनी सांगितले.