अनिसतर्फे निर्भय मार्निग वॉक रॅली

म. टा. प्रतिनिधी, जळगाव

अनिसचे डॉ. नरेंद्र दाभोलकर यांच्या हत्येला चार वर्ष पूर्ण झाले. तरी त्यांचे मारेकरी मोकाट आहेत. त्यांना अटक करावी या मागणीकरिता ‘जवाब दो’ आंदोलनांतर्गत शुक्रवारी (दि.१८) बहिणाबाई उद्यानात महाराष्ट्र अंधश्रद्धा निर्मूलन समिती, जळगावतर्फे निर्भय मॉर्निंग वॉक रेली काढली.

आंदोलनानंतर आमदार सुरेश भोळे यांना निवेदन देण्यात आले. डॉ. नरेंद्र दाभोलकर, कॉ. गोविंद पानसरे, एस. एम. कलबुर्गी यांची हत्या झाली. शासनासह तपास यंत्रणा तपासाबाबत गंभीर नाही याच्या निषेधार्थ हे आंदोलन करण्यात आले. फरार संशयिताना अटक करण्यात तपासी यंत्रणा का अपयशी ठरल्या?, अद्यापही आरोपी फरार का? त्यांना अटक न करू शकण्यामागे काय कारणे आहेत? याची उत्तरे या आंदोलनातून अंनिसने मागितली.

यावेळेला ‘जवाब दो, जवाब दो’ ‘डॉ. दाभोलकर अमर रहे ’ ‘सनातनच्या खुनी साधकांना अटक करा’ अशा घोषणा देण्यात आल्या. संशयित सनातनच्या सारंग अकोलकर, विनय पवार, प्रवीण निंबकर, जयप्रकाश हेगडे या साधकांची एनआयच्या वेबसाईटवरील फोटो, रेखाचीत्रे सार्वजनिक ठिकाणी लावावी, सनातन संस्थेची चौकशी एसआयटीकडून व्हावी अशा मागण्या करण्यात आल्यात. आंदोलनस्थळी आमदार सुरेश भोळे यांनी तपासाबाबत मुख्यमंत्र्यांकडे पाठपुरावा करेन, असे आश्वासन दिले. यावेळी राज्य पदाधिकारी डॉ. प्रदीप जोशी, शहराध्यक्ष डॉ. अजय शास्त्री, जिल्हा कार्याध्यक्ष प्रा. डी. एस. कट्यारे, अॅड. भरत गुजर, शहर कार्याध्यक्ष हेमंत सोनावणे, सचिव पीयूष तोडकर, शिरीष चौधरी, सागर नाईक, तुषार सूर्यवंशी, राहुल खरात, अतुल चित्ते, आशुतोष वानखेडे, अॅड. एस. एस. पाटील, प्रा. विश्वजीत चौधरी, नारायण वाघ, आर. एस. चौधरी, मुकुंद सपकाळे आदी उपस्थित होते.