मराठा आरक्षणास मंजुरी; जळगावात आनंदोत्सव

म. टा. प्रतिनिधी, जळगाव
मराठा समाजाला शिक्षण आणि सरकारी नोकऱ्यांमध्ये आरक्षण देणाऱ्या कायद्याला गुरुवारी (दि. २७) मुंबई उच्च न्यायालयाकडून सशर्त मंजुरी देण्यात आली. राज्य सरकार आणि मराठा समाजाच्यादृष्टीने हा मोठा विजय मानला जात आहे. उच्च न्यायालयाने दिलेल्या निर्णयाचे स्वागत करीत जळगावात मराठा क्रांती मोर्चाच्या पदाधिकाऱ्यांसह मराठा समाजबांधवांनी एकत्र येत एकच जल्लोष केला.

सुरुवातीला छत्रपती शिवाजी महाराजांच्या पुतळ्यास अभिवादन करण्यात आले. त्यानंतर फटाक्यांची आतषबाजी तसेच जोरदार घोषणाबाजी करीत आनंदोत्सव साजरा करण्यात आला. मराठा समाजाला देण्यात आलेले आरक्षण हे सहजासहजी मिळालेले नाही. त्यासाठी अनेक समाजबांधवांनी आपले बलिदान दिले आहे. हे आरक्षण त्यांना समर्पित करण्यात येत आहे. त्यांचे ऋण आम्ही समाजबांधव कधीही विसरणार नाही. आज खऱ्या अर्थाने राज्यात बहुसंख्येने असलेल्या मराठा समाजाला न्याय मिळाला आहे, अशा भावना या वेळी मराठा क्रांती मोर्चाच्या पदाधिकाऱ्यांनी व्यक्त केल्या.

समाजाच्या एकजुटीचा विजय
दरम्यान, उच्च न्यायालयाने मराठा आरक्षणावर शिक्कामोर्तब केल्याने मराठा समाज मागास असल्याचे सिद्ध झाले आहे. मराठा समाजाला मूळ मागणीप्रमाणे १६ टक्के आरक्षण देता येणे शक्य नसले तरी त्याऐवजी १२ ते १३ टक्के आरक्षण देता येणे शक्य आहे. हा मराठा समाजाच्या एकजुटीचा विजय आहे, असेही या वेळी मराठा समाजबांधवांनी सांगितले.