रेल्वे गेटवरील उड्डाणपुलांसाठी ७० कोटी

म. टा. प्रतिनिधी, जळगाव
पावसाळी तसेच अर्थसंकल्पीय अधिवेशनात अर्थसंकल्पीय अंदाजपत्रकामध्ये जळगावातील पिंप्राळा रेल्वेगट व शिवाजीनगर रेल्वेगेटवर उड्डाणपूल बांधण्यासाठी सरकारने ७० कोटी रुपये मंजूर केले आहेत. आमदार सुरेश भोळे यांनी यासाठी केलेल्या पाठपुराव्याला यश आले आहे.

जळगाव शहरातील पिंप्राळा रस्त्यावरील रेल्वे फाटकावरील फाटक क्र. १४७ याठिकाणी उड्डाणपूल बांधण्यासाठी ६० कोटी रुपये निधी मंजूर केला आहे. तसेच जळगाव शहरातील शिवाजीनगर रस्त्यावरील रेल्वे फाटकावर रेल्वे उड्डाणपूल बांधणे या कामासाठी १० कोटी रुपये अतिरिक्त निधी मंजूर केले आहेत. या दोन्ही कामांसाठी एकूण ७० कोटी निधी मंजूर करून दिल्याबाबत महसूल मंत्री चंद्रकांत पाटील व जलसंपदा मंत्री तथा पालकमंत्री गिरीश महाजन यांचे आमदार भोळे यांनी आभार मानले. सरकारच्या या अंदाजपत्रकामध्ये सर्व समाजांतील घटकांचा विचार केला असून, अर्थसंकल्पामध्ये विद्यार्थी, शेतकरी आणि मजूर वर्ग यांच्यासाठी भरीव तरतूद केल्याचेही आमदार भोळे यांनी सांगितले.