गणपतीनगरात सशस्त्र दरोडा

म. टा. प्रतिनिधी, जळगाव

शहरातील उपनगर पिंप्राळा येथील गणपती नगरातील पाटील कुटुंबीय घरात झोपलेले असताना मागील खोलीचा दरवाजा तोडून पाच दरोडेखोरांनी कुटुंबीयांच्या गळ्याला तलवार लावून ४५ ग्रॅम वजनाच्या सोन्यासह ३५ ते ४० हजारांची रोकड लंपास केल्याची घटना गुरुवारी (दि. २३) पहाटे २:३० वाजता घडली. पोलिस पथकाकडून घटनास्थळाची पाहणी करण्यात आली. ठसे तज्ज्ञ व श्वान पथकालाही पाचारण करण्यात आले होते.

एरंडोल तालुक्यातील कासोदा येथील मुळचे रहिवाशी सुरेश रमेश पाटील हे पिंप्राळा येथे पत्नी प्रीती, मुलगा अरमान व मुलगी खुशी यांच्यासोबत गेल्या दीड वर्षांपासून गणपती नगरात राहतात. ते सुनील एन्टरप्रायझेसला कामाला आहेत तर त्यांच्या पत्नीदेखील खासगी नोकरी करतात. पाटील यांच्या घरी त्यांचे चुलत भाऊ अनिल पाटील हे पत्नीसोबत काही दिवसांसाठी भेटीसाठी आले आहेत. बुधवारी (दि. २२) रात्री जेवण झाल्यानंतर संपूर्ण पाटील कुटुंबीय झोपले होते. गुरूवारी पहाटे सर्व घरात झोपलेले असताना दरोडेखोरांनी त्यांच्या घराच्या मागच्या दरवाज्याला जोरात हिसका दिला. आवाज झाल्याने सुरेश यांना जाग आली. काही समजण्याच्या आताच दोन दरोडेखोरांनी घरात प्रवेश करीत त्यांच्या गळ्याला तलवार लावून घरातील सोने-दागिने व रोकड देण्यास सांगितले. भीतीपोटी प्रीती यांनी घराच्या कपाटातील ३० ग्रॅम वजनाचे सोने व ३० ते ३५ हजारांची रोकड दरोडेखोरांना काढून दिली. यानंतर अनिल यांच्या गळ्यातील चैन व ६ हजार रुपये व पत्नीजवळील १५ ग्रॅम सोने हिसकावून दरोडेखोर पसार झाले.