कट लागल्यानंतर चाकू हल्ला

म. टा. प्रतिनिधी, जळगाव

दुचाकीचा कट लागल्याचा जाब विचारल्याच्या कारणावरून पादचार्‍यावर चाकू हल्ला झाल्याची घटना रविवारी (दि. १७) रात्री ११:४५ वाजता गेंदालाल मिल येथे घडली . पादचार्‍यावर रुग्णालयात उपचार सुरू आहेत. शेख मुस्ताक शेख करीम असे जखमीचे नाव आहे.

शेख मुस्ताक शेख करीम (वय-२९, रा. गेंदालाल मिल) हे रविवारी रात्री ११:४५ वाजता गेंदालाल मिल भागातील अज्जु डेअरीसमोरून पायी जात असताना जुबेर खान नासिर खान याने दुचाकीवरून त्यांना कट मारला. यातच मुश्ताक यांनी कट का मारला? याचा जाब विचारताच जुबेरने त्यांना शिवीगाळ करत बेल्टने मारहाण केली. तेवढ्यातच त्याठिकाणी जुबेर याचे भाऊ इजाज खान नासिर खान, जावेद खान नासिर खान, जुनेद खान नासिर खान (सर्व रा. गेंदालाल मिल) यांनी धाव घेत मुश्ताक यांना पुन्हा मारहाण केली. यावेळी इजाज याने मुश्ताक यांच्या पोटावर चाकूने वार केला. हल्ला केल्याप्रकरणी जुबेर खान, इजाज खान नासिर खान, जावेद खान नासिर खान, जुनेद खान नासिर खान यांच्याविरुद्ध शहर पोलिस ठाण्यात गुन्हा दाखल करण्यात आला आहे.

मोबाइलची चोरी

राज मालती नगरात रविवारी (दि. १७) रात्री ८ वाजेला हनुमान मंदिर येथून राहुल सोनू महाले यांच्या खिशातून १८ हजार रुपये किमतीच्या मोबाइलची चोरी झाली. याबाबत राहुल महालेच्या फिर्यादीवरून शंकर विरुद्ध गुन्हा नोंद केला आहे.