बँक खात्यांचे ‘आधार’ संलग्नीकरण युद्धपातळीवर करा

जिल्हाधिकारी किशोरराजे निंबाळकर यांचे निर्देश

म. टा. प्रतिनिधी, जळगाव

लाभार्थ्यांच्या बँक खात्यात थेट लाभ जमा करण्याच्या धोरणास अनुसरून बँक खात्यांचे आधार क्रमांकाशी संलग्नीकरण युद्धपातळीवर पूर्ण करण्यात यावे, असे निर्देश जिल्हाधिकारी किशोर राजे निंबाळकर यांनी सोमवारी (दि. २०) झालेल्या जिल्हास्तरीय बँक समन्वय समितीच्या बैठकीत दिले.

जिल्हास्तरीय बँक समन्वय समितीची बैठक आज जिल्हाधिकारी किशोर राजे निंबाळकर यांच्या अध्यक्षतेखाली पार पडली. यावेळी मुख्य कार्यकारी अधिकारी आस्तिककुमार पाण्डेय, जिल्हा ग्रामीण विकास यंत्रणेचे प्रकल्प संचालक विक्रांत बगाडे, जिल्हा अग्रणी बँकेचे जिल्हा समन्वयक एस. व्ही. दामले, जिल्हा उपनिबंधक विशाल जाधवर, नाबार्ड बँकेचे सोमवंशी, सामाजिक उत्थान व प्रशिक्षण केंद्राचे एस.एस. इखारे, स्टेट बँकेचे जिल्हा समन्वयक सुनिल सराते यांच्या सह विविध बँकांचे शाखाप्रमुख उपस्थित होते.

रब्बी हंगामासाठी १९३ कोटी कर्जवाटप

जिल्ह्यात आधार सीडिंग अर्थात आधार क्रमांकाचे बँक खात्याशी संलग्नीकरण काम येत्या कालावधीत युद्धपातळीवर पूर्ण करावे, असे निर्देश जिल्हाधिकारी निंबाळकर यांच्याकडून देण्यात आले. यावेळी त्यांनी प्रत्येक बँकनिहाय आधार क्रमांक संलग्नीकरणाच्या कामाचाही आढावा घेतला. तसेच यावेळी पीक कर्ज वितरणाचाही आढावा घेण्यात आला. त्यानुसार जिल्ह्यातील विविध बँकांतून रब्बी हंगामासाठी ९२ टक्के (१९३ कोटी ७० लाख रुपये) कर्जवाटप करण्यात आले आहे. तर खरीप हंगामासाठी ८४ टक्के (२२३९ कोटी १८ लाख रुपये) कर्जवाटप करण्यात आले आहे. याचबरोबर प्रधानमंत्री जनधन योजने अंतर्गत बँक खाते सुरू केलेल्या नागरिकांना ‘रुपे कार्ड’ वापराबाबतचाही आढावा या बैठकीत घेण्यात आला.