सौंदर्य नव्हे कीर्ती महत्त्वाची

म. टा. प्रतिनिधी, जळगाव

प्रत्येक गोष्टीसाठी सौंदर्य महत्त्वाचे असते असे नाही. दिसायला कसेही असो कीर्ती महत्त्वाची असते, असे मत संमोहन तज्ज्ञ नवनाथ गायकवाड यांनी बुधवारी (दि. १९) सकाळी ११ वाजता पोलिस दलातर्फे आयोजित 'संवाद कौशल्य व तणाव व्यवस्थापन' कार्यशाळेत सांगितले.

पोलिस अधीक्षक दत्तात्रय कराळे यांच्या हस्ते कार्यशाळेचे दीपप्रज्वलन करुन उद्घाटन करण्यात आले. यावेळी अप्पर पोलिस अधीक्षक बच्चन सिंह, उपविभागीय पोलिस अधीक्षक सचिन सांगळे, पोलिस उपअधीक्षक रशिद तडवी उपस्थित होते. मार्गदर्शन करतांना नवनाथ गायकवाड यांनी सांगितले की, बॉस हाच पालक, असे मानून काम करा, पालक रागवले तर ऐकून घ्या, वरिष्ठांना रागवायचे पैसे दिले जातात. जे मिळते त्यावर समाधान माना, प्रत्येक प्राण्याला ताण आला की शरीराच्या हालचाली सुरू करतो, आणि आपल्या शरीराला तयार करीत असतो, काम करतो म्हणून चुका होतात, असेही ते म्हणाले.

मुलांना घडविण्यासाठी प्रेमाने घ्या

मनामध्ये निश्चय करा म्हणजे ते काम होते, आपल्याला कोणी कितीही बोलले तरी बोलायचे नाही, चुपचाप बाहेर आल्यावर हसून घ्यायचे म्हणजे ताण कमी होतो. हसण्यामुळे स्थायुच्या हालचाली होतात, सुरकुत्या कमी पडतात, असेही त्यांनी सांगितले. पती-पत्नीच्या भांडणामध्ये पती जेव्हा बोलतो तेव्हा बोलू द्या, नंतर तुम्ही सुरू करा तोपर्यंत त्यांचा आऊटगोईंग बंद झालेला असतो, अशाप्रकारे त्यांनी यावेळी मार्गदर्शन केले. मित्रांनो या संवाद कौशल्यावरूनच मी दोन विभक्त परिवार एकत्र आणले आहे तसेच आताची पिढी हुशार आहे, त्यामुळे मुले ही घडवायचे आहे, मुले घाबरली तर प्रेमाने घ्या, असा सल्ला उपस्थित पोलिस दलातील परिवाराला दिला.