भाऊंचे उद्यान आता ‘चित्ररूपात’

म. टा. प्रतिनिधी, जळगाव

श्रद्धेय पद्मश्री डॉ. भवरलालजी जैन यांच्या ८० व्या वाढदिवसानिमित्त भाऊंचे उद्यान ‘चित्ररूपात’ साकारण्याची किमया चित्रकार आनंद पाटील यांनी केली आहे. या चित्रांचे प्रदर्शन काव्यरत्नावली चौकातील भाऊंच्या उद्यानात उद्या मंगळवारी (दि.१२) भरविण्यात येणार आहे.

या प्रदर्शनाचे उद्घाटन सायंकाळी सहा वाजता जैन उद्योग समूहाचे अध्यक्ष अशोक जैन यांच्या हस्ते होईल. या प्रदर्शनाद्वारे श्रद्धेय मोठ्याभाऊंना ‘चित्रपुष्पांजली’ अर्पित करण्यात येईल. शहराच्या सौंदर्यीकरणात मोलाची भर टाकणारे ‘भाऊंचे उद्यान’ शहरवासियांसाठी आनंदासोबत आरोग्य संवर्धन करणारे असल्याने अल्पावधित लोकप्रिय झाले आहे.

या उद्यानात संपन्न होणाऱ्या बहुविध समाजाभिमुख उपक्रमात नागरिकही सहभाग नोंदवतात. मुलांसाठी विविध खेळणी, व्यायाम, वॉकिंगसाठी विशेष सुविधांमुळे उद्यानात नेहमी गर्दी असते. भाऊंच्या उद्यानातील निसर्ग संपदेचे हुबेहूब चित्रण जैन इरिगेशनच्या आर्ट विभागाचे सहकारी आनंद पाटील यांनी केले आहे. मनात साकारलेल्या भाऊंच्या उद्यानाचे चित्रण त्यांनी सर्वदृष्ट्या केले असून, या ५१ चित्रांचे प्रदर्शन भाऊंच्या उद्यानातील ‘वसंत वानखेडे आर्ट गॅलरी’त भरविण्यात येणार आहे.

आनंद पाटील यांनी मुंबई येथील सर जे. जे. इन्स्ट‌िट्यूटमधून बी. एफ. ए., मू. जे. महाविद्यालयाच्या ओजस्विनी येथून एम. एफ. ए केले आहे. त्यांना उत्तम स्केचिंगसाठी १९९६ ला पारितोषिक मिळाले आहे. १९९९ मध्ये त्यांच्या चित्रांची दखल मुंबई आर्ट सोसायटीसाठी पेटींगची निवड झाली होती. राज्य कला प्रदर्शनात पाटील यांनी साकारलेल्या चित्र रचनेची सन २००० व २००१ मध्ये दोन वेळा निवड झाली. जे. जे. मध्ये शिक्षण घेत असताना शेवटच्या वर्षाला देण्यात येणारे ‘कॅम्लीन पारितोषिक’सन २००३ मध्ये त्यांनी पटकाविले. उत्तर महाराष्ट्र विद्यापीठातर्फे घेण्यात आलेल्या ‘खान्देश एक द्दष्टिक्षेप’ पोस्टर स्पर्धेतही सन २००७ मध्ये प्रथम क्रमांक तसेच दोनदा निसर्ग चित्रणाची प्रात्यक्षिके आनंद पाटील यांनी दिली आहेत; शिवाय ललित कला महाविद्यालय व मू.जे. महाविद्यालय येथे परीक्षक या नात्यानेही त्यांनी काम पाहिले आहे.