रेकॉर्ड गहाळप्रकरणी तक्रार नाहीच!

जन्म मृत्यू विभागाचा सुस्तपणा; नागरिकांचे हाल

म. टा. प्रतिनिधी, जळगाव

जळगाव महापालिकेतील जन्म-मृत्यू विभागातील अनेक वर्षाचे रेकॉर्ड गहाळ झाले असल्याने नागरिकांना नोंद मिळत नसल्याचे दाखले देण्यात येत आहेत. याबाबत अनेकदा अधिकाऱ्यांनी जन्म-मृत्यू विभागाला पोलिसात तक्रार करण्याच्या सूचना देऊनही विभागाने त्याची दखल न घेतल्याने नागरिकांचे हाल होत आहेत.

जळगाव शहर महानगरपालिकेच्या तिसऱ्या मजल्यावर असलेल्या जन्म-मृ्त्यू विभागात शहरातील जन्मलेल्या व्यक्तींच्या व मृत्यू झालेल्या व्यक्तीची नोंद घेण्यात येते. जुने रजिस्टर असल्याने ती आता जीर्ण झाली आहेत. अनकांची पाने गायब झाली आहेत. काहींची पाने फाटली आहेत. यामुळे जन्म-मृत्यू विभागातील नोंदी आढळत नसल्याने नागरिकांना दाखले मिळत नाहीत. परिणामी, त्यांना दररोज विभागात फेऱ्या माराव्या लागत आहेत. महापालिकेतील महत्त्वाचे रेकॉर्ड असणाऱ्या जन्म-मृत्यू विभागातील जन्माच्या नोंदीचे सन १९६९, १९७७, १९७९, १९६७, १९६८, १९५९, १९६१ तर मृत्यूचे सन १९५६, १९५३, १९५४, १९५२ या वर्षाचे रेकॉर्ड गहाळ झाले आहे. त्यामुळे या वर्षाचे दाखले घेण्यासाठी येणाऱ्या नागरिकांना आढळत नसल्याने दाखले देण्यात येत असल्याने त्यांना न्यायालयात जावून प्रक्रीया करावी लागत असल्याने त्यांचे हेलपाटे होत आहे.

तत्कालीन आयुक्त व उपायुक्तांनी गहाळ झालेल्या रेकॉर्डबाबत पोलिसात तक्रार देण्याच्या सूचना जन्म-मृत्यू विभागाला दिल्या होत्या. मात्र, या विभागाकडून अधिकाऱ्यांच्या सूचनांची दखल न घेतली गेल्यानेच नागरिकांना याचा मनस्ताप होत आहे. याबाबत पोलिसात तक्रार दिल्यास गहाळ नोंदीबाबत न्यायालयाच्या परवानगीने नवीन नोंदी करण्यात येऊन नागरिकांचे हाल थांबविता येणे शक्य आहे.