वाणी, तायडेंकडे बेहिशेबी मालमत्ता?

म. टा. प्रतिनिधी, जळगाव

नोटबदली प्रकरणात चौकशी करण्यात आलेल्या नंदू वाणी व भूषण तायडे यांच्या मालमत्तांच्या कागदपत्रांची सीबीआयकडून छानणी केली जात आहे. त्यांच्याकडे बेहिशेबी मालमत्ता असल्याचा संशय सीबीआयला असल्याने त्यांच्याविरुद्ध लाचलुचपत प्रतिबंधक विभागाकडेही तक्रार केली जाणार असल्याची शक्यता आहे. दरम्यान, शनिवारी (दि. २५) नंदू वाणी, भूषण तायडे यांच्यासह भरत शाह, ओम जहांगीर यांचीही चौकशी करण्यात आली.

नोटाबंदीच्या काळात जिल्हा बँकेत ७३ लाख रुपयांच्या नोटा बदलल्याप्रकरणी ही पूर्ण चौकशी सुरू आहे. यात अगोदर जिल्हा बँकेचे व्यवस्थापकीय संचालक जितेंद्र देशमुख यांच्यासह चोपडा येथील दोघा अधिकाऱ्यांविरुद्ध सीबीआयकडून दिल्लीत गुन्हा दाखल करण्यात आला आहे. त्यासोबतच सीबीआयच्या पथकाने मुंबईत जिल्हा परिषदेतील अधिकाऱ्यांचीही चौकशी केली आहे. यात सुनील सूर्यवंशी, नंदू पवार, भूषण तायडे यांची तर शुक्रवारपासून नंदू वाणी यांची चौकशी सुरू केली आहे. यातील नंदू वाणी व भूषण तायडे यांच्याकडील मालमत्तेच्या कागदपत्रांची तपासणी सीबीआयकडून केली जात आहे. त्यांच्याकडे बेहिशेबी मालमत्ता असल्याची खात्री असल्याने याबाबत लाचलुचपत प्रतिबंधक विभागाकडे स्वतंत्र तक्रार केली जाणार आहे.