सभापती संध्या महाजनांचे सदस्यत्व रद्द

म. टा. प्रतिनिधी, जळगाव

यावल येथील काँग्रेसच्या पाठबळावर विजयी झालेल्या पंचायत समितीच्या सभापती संध्या किशोर महाजन यांना पक्षांतर्गत बंदी कायद्यान्वये पंचायत सदस्यपदी अपात्र ठरवायचा आदेश जिल्हाधिकारी किशोर राजे निंबाळकर यांनी दिले आहेत.

मार्च २०१७ मध्ये यावल पंचायत समिती सभापतीची निवड झाली होती. तेव्हा भाजपने अपक्ष उमेदवार पल्लवी चौधरी यांना सभापतिपदाची उमेदवारी देऊन पक्षाच्या पाच सदस्यांनी त्यांना मतदान करावे असा व्हीप बजावला होता. मात्र सभापती निवडणुकीपूर्वी संध्या महाजन यांनी ऐनवेळी काँग्रेसचा पाठिंबा घेत स्वतःच सभापती पदाची उमेदवारी करीत पल्लवी चौधरींचा पराभव केला. यामुळे त्यांनी गटनेत्यांचा आदेश डावलल्याने दीपक पाटील यांनी त्यांच्याविरोधात पक्षांतर्गत बंदी कायद्यानुसार कारवाईची याचिका दाखल केली होती. त्यावर सुनावणी होऊन संध्या महाजन यांचे पंचायत समिती सदस्यत्व रद्द ठरविल्याचा आदेश देण्यात आला आहे.