दीडशेवर पर्यावरणप्रेमी जाणार चारठाण्याला

म. टा. प्रतिनिधी, जळगाव

जळगाव वन्यजीव संरक्षण संस्थेतर्फे व्याघ्र दिनानिमित्त जिल्ह्यातील वाघांच्या संवर्धनाच्या जनजागृतीनिमित्त मोटरसायकल रॅली काढण्यात येणार आहे. या रॅलीसाठी खान्देशातील १५० पर्यावरणप्रेमी आज (दि.२८) चारठाणा येथे रवाना होणार आहेत.

जळगावातील शिवकॉलनीतून सकाळी ११ वाजता हे पर्यावरणप्रेमी चारठाण्याकडे जातील. २९ जुलै रोजी, चारठाणा येथून रॅलीस सुरुवात होईल. रॅलीचा मार्ग चारठाणा, निमखेडी, महालखेडा, टाकळी, नांदवेल, डोलारखेडा, सुकळी, दुई, खामखेडा, असा राहील. मुक्ताईनगरला समारोप होईल. या रॅलीद्वारे वाघाचा अधिवास सुरक्षित राहण्याचे दृष्टीने जनजागृती होणार आहे. तत्पूर्वी वन्यजीव प्रेमी, वनाधिकारी, वनव्यस्थापन समितीचा गौरव करण्यात येणार आहे. खासदार रक्षा खडसे, टायगर कॉन्झर्वेशन अॅण्ड रिसर्च सेंटर, मुंबईचे अध्यक्ष प्रसाद हिरे उपस्थित राहतील. जिल्हाधिकारी यांना व्याघ्र संवर्धनासाठी निवेदन देण्यात येणार असल्याची माहिती बाळकृष्ण देवरे यांनी दिली. रॅली यशस्वीतेसाठी वनविभाग जळगाव व यावल यांचे मार्गदर्शन, टीसीआरसी व आमदार राजूमामा भोळे युवा फाउंडेशनचे सहकार्य लाभत आहे.