मुख्य निरीक्षकांकडून निवडणुकीचा आढावा

मुख्य निवडणूक आयुक्त सहारिया आज जळगावात

म. टा. प्रतिनिधी, जळगाव

महापालिका निवडणुकीच्या तयारीची आढावा घेण्यासाठी मुख्य निवडणूक निरीक्षक प्राजक्त लवंगारे सोमवारी रात्री आल्या आहेत. मंगळवारी (दि. १७) सकाळी अकरा वाजता मनपात येऊन त्यांनी जिल्हाधिकारी, आयुक्त तसेच उपविभागीय पोलिस अधिकारी यांच्याकडून निवडणूक संदर्भातील तयारीचा आढावा घेतला.

पालिकेच्या निवडणुकीसाठी मंगळवारी मुख्य निवडणूक निरीक्षक प्राजक्ता लवंगारे यांनी मनपात येत कामकाजाचा आढावा घेतला. सतराव्या मजल्यावरील महापौरांच्या दालनात त्यांचे कार्यालय तयार करण्यात आले असून, सकाळी अकरा वाजता जिल्हाधिकारी किशोर राजेनिंबाळकर, मनपा आयुक्त चंद्रकांत डांगे, पोलिस उपविभागीय अधिकारी सचिन सांगळे यांची वेगवेगळी बैठक घेऊन निवडणुकीसाठी काय तयारी केली याचा त्यांनी
आढावा घेतला. तसेच मनपा, जिल्हा प्रशासन व पोलिस विभागाला महत्त्वाच्या सूचना देत तयारी करण्याचे सांगितले. आज (दि. १८) राज्य निवडणूक आयोगाचे मुख्य आयुक्त जे. एच. सहारिया जळगावात येणार आहेत. मुख्य आयुक्त या दौऱ्यात मनपाच्या निवडणुकीचा आढावा घेणार आहेत. त्यामुळे निवडणूक तयारीबाबतच्या आवश्‍यक सूचनाही मुख्य निवडणूक निरीक्षक लवंगारे यांनी अधिकाऱ्यांना दिल्या.

कायदा सुव्यवस्थेची माहिती
पोलिस प्रशासनाचा आढावा घेतल्यानंतर मुख्य निवडणूक निरीक्षक लवंगारे यांनी निवडणूक काळात कायदा सुव्यवस्था बाबतची माहिती घेतली. तसेच आवश्‍यक सूचना उपविभागीय पोलिस अधिकारी सांगळे यांना दिल्या. निरीक्षक प्राजक्ता लवंगारे यांची महापौरांच्या दालनात असलेल्या कार्यालयात संगणक, टी. व्ही. यांच्या माध्यमातून निवडणुकीच्या कामकाजावर लक्ष ठेवले जाणार आहे.