बाळाच्या मृत्यूने सिव्हिलमध्ये गोंधळ

म. टा. प्रतिनिधी, जळगाव

सिव्हिल हॉस्पिटलमध्ये प्रसूतीसाठी दाखल झालेल्या महिलेच्या बाळाचा पोटातच मृत्यू झाला. डॉक्टर व परिचारिकांनी उपचारादरम्यान केलेल्या दुर्लक्षामुळेच बाळाचा मृत्यू झाल्याचा आरोप करीत महिलेच्या नातेवाईकांनी हॉस्पिटलमध्ये गोंधळ घातल्याने तणाव निर्माण झाला होता.

रुग्णाकडून कपडे बदलण्याचे पैसे घेतल्यामुळे कर्मचाऱ्यांविरुद्ध संताप व्यक्त करण्यात आला. यावल तालुक्यातील पाडळसा येथील वैशाली सुपडू कोळी (वय २७) या बाळांतीण महिलेला शुक्रवारी (दि. २१) रात्री १२.३० वाजेच्या सुमारास सिव्हिलमध्ये प्रसूतीसाठी दाखल केले होते. दुसऱ्या दिवशी शनिवारी (दि. २२) सकाळपर्यंत त्यांची तपासणी केली नाही. सकाळी ९ वाजता डॉक्टर आले. त्यांनी बाळाने पोटात घाण केल्याचे सांगितले. त्यानंतर तब्बल चार तासानंतर प्रसूती केली त्यावेळी बाळ मृतावस्थेत जन्माला आले.

नातेवाईक संतप्त

डॉक्टर आणि कर्मचारी यांच्या दुर्लक्षामुळेच मृत बाळ जन्माला आल्याचा आरोप महिलेच्या नातेवाईकांनी केला. त्यानंतर नवीन इमारतीतील दुसऱ्या मजल्यावर वैशाली कोळी यांना शिफ्ट करण्यात आले. त्याचेही कंत्राटी कर्मचाऱ्यांनी पैसे घेतले. तसेच कपडे बदलण्याचेही त्यांच्याकडून २०० रुपये घेतल्याचा आरोपही महिलेची वहिणीने केला. एकीकडे दुर्लक्षामुळे बाळाचा मृत्यू झाला. त्यात प्रत्येक कामासाठी पैसे द्यावे लागत असल्याने कोळी कुटुंबियांनी कर्मचाऱ्यांजवळ संताप व्यक्त केलो. दोन्ही बाजूकडून जोरजोरात बोलत असल्याने गोंधळ होवून काहीवेळ तणाव निर्माण झाला. सिव्हिल हॉस्पिटलमध्ये येणाऱ्या प्रत्येक रुग्णांकडून पैसे घेतले जात असल्याच्या तक्रारी तेथील रुग्णांनी केल्या.