फुले मार्केटची स्वच्छता अखेर व्यापाऱ्यांकडूनच!

म. टा. प्रतिनिधी, जळगाव

महात्मा फुले मार्केटची स्वच्छता, पार्किंगची व्यवस्था व सार्वजनिक शौचालयांच्या देखरेखीचे काम तेथील व्यापारी असोसिएशनकडूनच करण्याचा निर्णय गुरुवारी (दि. २३) घेण्यात आला. मार्केटमधील व्यापाऱ्यांनी अप्पर आयुक्त राजेश कानडे यांच्याशी केलेल्या चर्चेअंती गुरुवारी हा निर्णय झाला. तसेच मार्केटमध्ये हॉकर्सला बंदी करण्यासाठी अतिक्रमण निर्मूलन विभागाचे ६ कर्मचारी कायम येथे नियुक्त करण्याचे आश्वासनही कानडे यांनी दिले.

फुले मार्केटमधील व्यापाऱ्यांचे शिष्टमंडळ गुरुवारी महापालिकेत आले होते. यावेळी त्यांनी प्रभारी अप्पर आयुक्तांची भेट घेतली. व्यापाऱ्यांच्या शिष्टमंडळात हिरानंद मंधवाणी, बबलू समदाडिया, प्रदीप जैन, रमेश मताणी यांचा समावेश होता. या शिष्टमंडळाने फुले मार्केटमधील स्वच्छता, पार्किंग व्यवस्था, सार्वजनिक शौचालयांच्या देखरेखीचा विषय मांडला. यावर अप्पर आयुक्तांनी ही जबाबदारी महापालिकेची नसल्याने सांगत फुले मार्केट असोसिएशनने जबाबदारी घ्यावी, असे सांगितले. तसेच स्वच्छतेसाठी व्यापाऱ्यांनी माणसे नेमावी, वाहने शिस्तीत लागण्यासाठी पार्किंग व्यवस्थेसाठी माणसांची नेमणूकच्या सूचनाही

कानडेंनी केल्या. फुले मार्केटमध्ये हॉकर्सचे अतिक्रमण वाढले असून, यावर अप्पर आयुक्त कानडे यांनी हॉकर्सबंदीसाठी महापालिका अतिक्रमण निर्मूलन विभागाचे ६ कर्मचारी कायम नियुक्त करीत असल्याचे सांगितले.