वार्षिक सरासरीच्या तुलनेत जिल्ह्यात वीस मिलीमीटर पावसाची नोंद

म. टा. प्रतिनिधी, जळगाव

बहुप्रतीक्षेनंतर जिल्ह्यात पावसाचे आगमन झाले आहे. गेल्या दोन दिवसांत जिल्ह्यात चांगला पाऊस झाला असून, मंगळवार (दि. २५) पर्यंत वार्षिक सरासरीच्या तुलनेत १९.५ टक्के इतका पाऊस पडल्याची नोंद करण्यात आल्याची माहिती जिल्हा प्रशासनाने दिली आहे.

जिल्ह्याचे वार्षिक सरासरी पर्जन्यमान ६६३.३ मिलीमीटर इतके आहे. यावर्षी मात्र १९.५ मिलीमीटर म्हणजेच मागील वर्षीपेक्षा ६३.८० मिलीमीटर इतका कमी पाऊस पडला आहे. जिल्ह्याच्या वार्षिक सरासरीचा विचार केला असता आजपर्यंत सर्वाधिक ५६.५ टक्के इतका पाऊस जामनेर तालुक्यात पडला असून, सर्वात कमी म्हणजेच २.९ टक्के पाऊस जळगाव तालुक्यात पडला आहे. जिल्ह्यात मंगळवारी (दि. २५) दिवसभरात २.३ मिलीमीटर पाऊस पडल्याची नोंद आहे.

तालुकानिहाय पाऊस (मिलीमीटरमध्ये)
जामनेर - ५६.५
पाचोरा - ३९.४
भुसावळ - ३४.२
धरणगाव - २६.६
चाळीसगाव - २०.८
रावेर - २०.४
यावल - १९.६
अमळनेर - १४.१
भडगाव - १२.८
पारोळा - १०.६
बोदवड - १०.३
चोपडा - १०.०
एरंडोल - ७.५
मुक्ताईनगर - ६.८
जळगाव - २.९