आघाडीचा ‘जळगाव-पॅटर्न’ राज्यभरात राबवावा

म. टा. प्रतिनिधी, जळगाव

पदवीधरच नव्हे तर जिल्हा परिषद पंचायत समिती निवडणुकीत काँग्रेस आणि राष्ट्रवादी काँग्रेसच्या आघाडीचा ‘जळगाव-पॅटर्न’ संपूर्ण राज्यात राबविल्यास महाराष्ट्रात पुरोगामी विचारसरणीची सत्ता आल्याशिवाय राहणार नाही, असे प्रतिपादन माजी कृषीमंत्री बाळासाहेब थोरात यांनी केले. शहरासह ग्रामीण भागातील जनतेला बदल हवा आहे, त्यासाठी सर्वांनी एकत्रित येऊन सत्ता मिळविण्यासाठी प्रयत्न करावा, असे आवाहनही बाळासाहेब थोरात यांनी केले.

जळगाव येथील रिंग रोड परिसरातील प्रांगणात आयोजित पदवीधर मेळाव्यात ते बोलत होते. नाशिक विभाग पदवीधर मतदारसंघाचे उमेदवार डॉ. सुधीर तांबे यांच्या प्रचारार्थ या मेळाव्याचे आयोजन करण्यात आले होते. मेळाव्यात बोलताना बाळासाहेब थोरात म्हणाले की, पदवीधर मतदारसंघाच्या ४ जिल्ह्यातील शिक्षण क्षेत्रातील विविध प्रश्न डॉ. सुधीर तांबे यांनी मार्गी लावले आहेत. त्यांचा कार्यकर्त्यांशी चांगला जनसंपर्क आहे. डॉ. तांबे यांनी आतापर्यंत विविध प्रश्न सोडविल्यामुळे त्यांचा विजय निश्चित असल्याचे थोरात यांनी सांगितले. सूत्रसंचालन नामदेव कांडळ व शैलेश राणे यांनी केले तर आभार यु. डी. पाटील यांनी मानले. व्यासपीठावर राष्ट्रवादी जिल्हाध्यक्ष डॉ. सतीश पाटील, काँग्रेसचे जिल्हाध्यक्ष अॅड. संदीप पाटील, टीडीएफचे एस. डी. भिरुड, प्रदेश सरचिटणीस गफ्फार मलिक, माजी आमदार अरूण पाटील, डॉ. ए. जी. भंगाळे, डॉ. राधेशाम चौधरी, विलास पाटील, संजय गरुड, अॅड. रवींद्र पाटील आदी उपस्थित होते.