वजनासाठी मक्तेदारांकडून कचऱ्यात माती टाकण्याचा प्रकार

दंडात्मक कारवाईसाठी उपमहापौरांच्या सूचना

म. टा. प्रतिनिधी, जळगाव

महापालिका प्रशासनाने जळगाव शहराच्या स्वच्छतेसाठी वॉटरग्रेस कंपनीला एकमुस्त मक्ता दिला आहे. मक्तेदाराने काम सुरू केल्यावर अवघ्या काही दिवसांतच प्रशासनाला फसविण्याचा प्रकार सुरू केल्याचे समोर आले आहे. कचऱ्याचे वजन वाढविण्यासाठी घंटागाडीत थेट माती व मुरुम भरण्यात येत असल्याच्या व्हिडीओसह तक्रारी यासंदर्भात उपमहापौरांकडे प्राप्त झाल्या आहेत. यावरून उपमहापौर डॉ. आश्विन सोनवणे यांनी सोमवारी (दि. २६) आरोग्यअधिकारी डॉ. विकास पाटील यांची कानउघाडणी करून मक्तेदारावर दंडात्मक कारवाई करण्याच्या सूचना दिल्या आहेत.

शहराच्या स्वच्छतेसह कचरा संकलनाची जबाबदारी १६ ऑगस्टपासून वॉटरग्रेस या मक्तेदारामार्फत सुरुवात करण्यात आली असून, २१ ऑगस्टपासून संपूर्ण शहराची जबाबदारी स्वीकारली आहे. मात्र, पाच दिवस उलटल्यानंतरही घराघरातून कचरा संकलन होऊ शकलेले नाही. घंटागाडी आली तरी सतत वेळ बदलली जात आहे. तसेच घंटागाडीतील कचरा हा स्कीप लोडरने उचलणे अपेक्षित असताना घंटागाडीतच भरला जात आहे. तर घंटागाडी घराघरातून कचरा संकलनासाठी वापरणे गरजेचे असते. मात्र, घंटागाडीचे वजन वाढण्यासाठी त्यात मातीदेखील भरली जात असल्याची बाब व्हिडीओच्या माध्यमातून उघड झाली आहे.

चुकीचे काम केल्यास कारवाई
या पूर्ण प्रकारानंतर उपमहापौर डॉ. सोनवणे यांच्याकडे पुराव्यानिशी तक्रार प्राप्त झाल्यानंतर सोमवारी दुपारी आरोग्याधिकारी डॉ. विकास पाटील व वॉटरग्रेस कंपनीचे व्यवस्थापक डॉ. चंद्रकांत भंगाळे यांची तातडीची बैठक घेतली. या वेळी मक्तेदाराच्या माध्यमातून पालिकेची फसवणूक सुरू आहे. नागरिकांच्या तक्रारी वाढल्या असून साफसफाईवर लक्ष केंद्रीत केले जात नसल्याचे सांगितले. पालिका प्रशासन कोट्यवधी रुपये खर्च करत आहे. यासाठी नागरिकांना कराच्या रकमेतून सुविधा दिल्या जात आहेत. चुकीच्या पद्धतीने काम केल्यास हयगय केली जाणार नाही, अशा शब्दांत त्यांनी सुनावले. तशी नोटीस बजावण्याचे निर्देशही उपमहापौर डॉ. सोनवणे यांनी दिले.