सोनवणेंचा राजीनामा

गाळेप्रकरणी प्रमुख नेत्यांच्या भूमिकेला विरोध करणे नडले

म. टा. प्रतिनिधी, जळगाव

महापालिका मालकीच्या मार्केटमधील मुदत संपलेल्या गाळेधारकांकडून यावर तोडगा काढण्यासाठी मोर्चा काढण्यात येणार होता. या मोर्चात खाविआचे नेते माजी आमदार सुरेश जैनदेखील सहभागी होणार होते. हायकोर्टाचे आदेश असल्याने मोर्चा सहभागी होणार नाही, असे म्हटल्याने खाविआचे कैलास सोनवणे यांना स्वीकृत नगरसेवकपदाचा राजीनामा देण्याचे आदेश नेत्यांनी दिल्याचे विश्वसनीय वृत्त आहे. त्यासाठी गुरूवारी (दि. १४) सकाळपासून सोनवणे राजीनामा देण्यासाठी जिल्हाधिकारी कार्यालय व महापालिकेत आले होते. मात्र, प्रभारी आयुक्त नाशिकला गेले असल्याने त्यांना राजीनामा देता आला नाही.

महापालिकेत कैलास सोनवणे यांनी गुरूवारी उपायुक्त चंद्रकांत खोसे यांना राजीनामा देण्याचा प्रयत्न केला. मात्र, उपायुक्तांनी राजीनामा आयुक्तांना द्यावा, असे सांगितले. नियमानुसार आयुक्तांना राजीनामा देणे आवश्यक असल्याचे सोनवणेंना सांगितल्यावर त्यांनी आपण स्पीड पोस्टने राजीनामा पाठवू, अशी माहिती सोनवणे यांनी पत्रकारांशी बोलताना दिली. ‘नेक काम मे देरी क्यो?’ असेही ते यावेळी म्हणाले. स्वीकृत नगरसेवक कैलास सोनवणे यांनी महापालिकेत स्थायी समिती सभापतींस अनेक पदे भूषवली आहेत. त्यांच्या पत्नी भारती सोनवणे या विद्यमान नगरसेविका असून, त्यांनी उपमहापौर पदावर काम केले आहे. मुदत संपलेल्या गाळेप्रकरणाशी सोनवणे यांना द्याव्या लागणाऱ्या राजीनाम्याचा संबध असल्याचे समोर येत आहे.

गाळे प्रकरणाशी संबध

महापालिकेच्या १८ मार्केटमधील २,१७५ गाळ्यांच्या भाडेकराराची मुदत संपली आहे. याबाबत महापालिकेने केलेला क्रमांक ४० व १३५ ठराव निर्णयासाठी सरकारकडे प्रलंबित आहे. तसेच याप्रकरणी हायकोर्टात दाखल असलेल्या याचिकांवर निर्णय देताना हायकोर्टाने हे गाळे ताब्यात घेण्याची प्रक्रिया दोन महिन्यांत पूर्ण करण्याचे आदेश दिले आहेत. तसेच गाळ्यांचा लिलाव करण्याचे संकेतही दिले आहेत.

मोर्चास विरोध अंगलट

गेल्या काही दिवसांपूर्वी खाविआचे नेते माजी आमदार सुरेश जैन यांना गाळेधारक संघटनेचे पदाधिकारी भेटले होते. या समस्येवर तोडगा काढण्याची विनंती केली होती. त्यानंतर पालकमंत्री चंद्रकांत पाटील यांनी दिलेल्या आश्वासनानंतर हा मूक मोर्चा स्थगित करण्यात आला होता. मात्र, सोनवणे यांनी मूक मोर्चात आपण येणार नाही, अशी स्पष्ट भूमिका मांडली होती. या गाळ्यांचा लिलावातून येणाऱ्या पैशातून शहराचा विकास व कर्जफेड करता येईल, असे आपले विचार असल्याचेही त्यांनी सांगितले. परिणामी, आपल्या नेत्यांच्या भूमिकेला विरोध केल्यानेच त्यांना राजीनामा घेतल्याचे आता बोलले जात आहे. ​

स्वतंत्र आघाडीचे संकेत?

खान्देश विकास आघाडीच्या नेत्यांनी आदेश दिल्याने आपण नगरसेवकपदाचा राजीनामा देत आहे. अतिशय आनंदाने राजीनामा देत असल्याचेही त्यांनी सांगितले. यापुढेदेखील जनतेची कामे करणार असल्याचे सोनवणेंनी सांगितले असून, पुढची भूमिका ठरविली नसल्याचे ते म्हणाले. तरी सोनवणे यांच्या एकूणच वक्तव्यावरून ते स्वतंत्र आघाडी करतील, असे संकेत मिळत आहेत.


आता जनतेसोबत राहणार

खान्देश विकास आघाडीने चार वर्षे स्वीकृत नगरसेवकपदाची संधी दिल्याने त्यांचे आभार, अशी प्रतिक्रिया कैलास सोनवणे यांनी व्यक्त केली. यापुढे आपण जनतेसोबत राहणार असल्याचेही त्यांनी सांगितले. नेत्यांच्या सूचनेनंतर विलंब नको म्हणून सकाळी १० वाजताच जिल्हाधिकारी कार्यालय गाठल्याचे त्यांनी सांगितले. मात्र प्रभारी आयुक्त तथा जिल्हाधिकारी किशोर राजे निंबाळकर गुरूवारी नाशिकला असल्याने राजीनामा देता आला नाही, असेही ते शेवटी म्हणाले.