उपमहापौरपदासाठी इच्छुकांमध्ये रस्सीखेच

ज्योती इंगळे, गणेश सोनवणेंसह नावांची चर्चा

म. टा. प्रतिनिधी, जळगाव

महापालिकेचे महापौर नितीन लढ्ढा यांनी काल बुधवारी महापौर पदाचा राजीनामा दिला. ठरल्यानुसार महापौरपदी आता उपमहापौर ललित कोल्हे यांची वर्णी लागणार आहे. त्यामुळे उपमहापौर पददेखील रिक्त होणार असल्याने यासाठी खान्देश विकास आघाडीतील नगरसेवकांमध्ये रस्सीखेच सुरु झाली आहे.

गेल्या महिनाभरापासून महापालिकेत महापौर बदलाचे वारे वाहत होते. मनसेचे ललित कोल्हे यांना शेवटच्या वर्षात महापौरपद देऊ, असे खान्देश विकास आघाडीचे प्रणेते सुरेश जैन यांनी दिले होते. त्यानुसार खांदेपालटाची शक्यता निर्माण झाली होती. गेल्या दोन दिवसांपासून याबाबत महापालिकेत चर्चा सुरू होती. अखेर बुधवारी रात्री आठ वाजता महापौर नितीन लढ्ढा यांनी जिल्हाधिकारी कार्यालयात जावून मनपाचे प्रभारी आयुक्त किशोर राजे निंबाळकर यांच्याकडे राजीनामा दिला.

प्रभारी महापौरपदी कोल्हे

ठरल्यानुसार आता महापौर पदावर मनसेचे गटनेते ललित कोल्हे यांची वर्णी लागणार आहे. नितीन लढ्ढा यांनी राजीनामा दिल्यानंतर उपमहापौर कोल्हे यांच्याकडेच सध्या महापौर पदाचा पदभार आला आहे. विभागीय आयुक्तांकडे महापौर निवडीसाठी प्रस्ताव गेल्यानंतर त्यांच्याकडून तारीख आल्यावर नव्या महापौरांची निवड होणार आहे.

खाविआमधील नगरसेवकांना निवडीचे वेध

ललित कोल्हे महापौर झाल्यानंतर उपमहापौर पदावर आपली वर्णी लागावी म्हणून खान्देश विकास आघाडीतील इच्छुकांना आता या पदाचे वेध लागले आहेत. या पदासाठी सध्या ज्योती इंगळे यांचे नाव चर्चेत आहे. दुसरीकडे आघाडीचे माजी गटनेते गणेश सोनवणे यांच्या व माजी उपमहापौर भारती सोनवणे यांच्याही नावाची चर्चा आहे. नगरसेवक शामकांत सोनवणे, संदेश भोईटेदेखील यासाठी इच्छुक असल्याचे समजते.