रस्ता लूट करणारा एलसीबीकडून जेरबंद

म. टा. प्रतिनिधी, जळगाव

सेवानिवृत्त कामगाराचे पैसे लुटून पसार झालेल्या आरोपीस स्थानिक गुन्हे शाखेने जेरबंद केले आहे. दिलावर गोविंद गावीत असे गुन्हेगाराचे नाव असून, त्याला धरणगाव पोलिस ठाण्यात पुढील तपासकामी देण्यात आले आहे.

रमेश परशुराम पाटील (वय ६०, रा. हिंगोणे खु. ता. धरणगाव) १ सप्टेंबर रोजी सकाळी २:३० वाजेच्या कल्याणे खु. ते हिंगोणे गावादरम्यान पंडित शंकर पाटील यांच्या शेताजवळ अज्ञात मोटर सायकलस्वाराने त्यांच्या मोटरसायकलला लाथ मारून खाली पाडले. यानंतर त्यांच्या खिशातील रोख रकमेसह त्यांची लूट करण्यात आली होती. याप्रकरणी धरणगाव पोलिस ठाण्यात गुन्हा दाखल करण्यात आला होता. या गुन्ह्याचे गांभीर्य ओळखून पोलिस अधीक्षक दत्तात्रय कराळे, अप्पर पोलिस अधीक्षक बच्चनसिंग, प्रशांत बच्छाव यांनी पोलिस निरीक्षक सुनील कुराडे आणि बाळासाहेब सोनवणे यांनाना सूचना व मार्गदर्शन केले. कुराडे यांनी सहाय्यक फौजदार नरुद्दीन शेख, पोलिस हेड कॉन्स्टेबल विजय पाटील, राजेंद्र पाटील, सुरेश महाजन, नरेंद्र वारूळे, चंद्रकांत पाटील, दिनेश बडगुजर, यांना चोपडा, शिरपूर, नंदुरबार, नवापूर व मध्यप्रदेश राज्यातील रस्ता लूट करणारे गुन्हेगारांची माहिती काढण्यात सांगुन पथक रवाना केले होते. त्याप्रमाणे दिलावर गोविंद गावीत (वय 35 रा. इटवाई ता. नवापूर जि. नंदुरबार) यास ताब्यात घेतले. त्याने गुन्हा केल्याची कबुली देत चोरी केलेला माल परत दिला.