एल. के. फाउंडेशनतर्फे दहीहंडी उत्सवाचे आयोजन

म. टा. प्रतिनिधी, जळगाव

शहरातील सागरपार्क मैदानावर एल. के. फाउंडेशनतर्फे राजेशाही दहीहंडी उत्सवाचे आयोजन करण्यात आले आहे. यंदा स्वातंत्र्यदिनी १५ ऑगस्ट रोजी दहीहंडी उत्सव साजरा होत असल्याने उत्साह व्दिगुणीत होणार आहे.

सागर पार्कवर होणाऱ्या या कार्यक्रमासाठी जलसंपदा मंत्री गिरीश महाजन, सहकार राज्यमंत्री गुलाबराव पाटील, पद्मश्री अॅड. उज्ज्वल निकम, जिल्हाधिकारी किशोर राजे निंबाळकर, जिल्हा पोलिस अधीक्षक दत्तात्रय कराडे, आमदार चंदुलाल पटेल, आमदार चंद्रकांत सोनवणे, आमदार सुरेश भोळे, महापौर नितीन लढ्ढा, जैन समूहाचे अध्यक्ष अशोक जैन, नगरसेवक रमेश जैन आदी मान्यवर उपस्थित राहणार आहेत.

मल्लखांबावर प्रात्यक्षिके दाखविणार

दहीहंडीच्या ठिकाणी महिलांसाठी स्वतंत्र व्यवस्था करण्यात आली असून, ८० व्यक्तींचे ढोलपथक याठिकाणी राहणार आहे. पार्किंगची व्यवस्थादेखील करण्यात आली आहे. यावेळचे आकर्षण म्हणजे महात्मा गांधी विद्यालयाचे विद्यार्थी मल्लखांबावर प्रात्यक्षिके दाखविणार आहेत. त्यात २० विद्यार्थी व ५ प्रशिक्षकांचा समावेश आहे. यासह नामवंत ग्लॅडिएटर डान्स ग्रुपतर्फे स्वतंत्र दिन व दहीहंडी थीमवर ग्रुप डान्सचे आयोजन करण्यात आले आहे. तसेच स्वच्छ भारत अभियान या थिमवर स्वराज्य पथनाट्य ग्रुपचे पथनाट्यदेखील होणार आहे. नागरिकांच्या सुविधेसाठी एलईडी स्क्रीनची व्यवस्था करण्यात आली आहे. दहीहंडी फोडणाऱ्या पथकाला आकर्षक बक्षिस देण्यात येणार असल्याचेही एल. के. फाउंडेशनचे अध्यक्ष ललित कोल्हे यांनी सांगितले आहे.