'दशक्रिया'शो अखेर सुरळीत

म. टा. प्रतिनिधी, जळगाव

'दशक्रिया' या चित्रपटाचे ऑनलाइन तिकीट घेतल्याने राष्ट्रवादी काँग्रेसच्या महिला पदाधिकाऱ्यांसह प्रेक्षकांनी रविवारी (दि. १९) दुपारी शो पाहण्यासाठी रिगल चित्रपटगृह गाठले. परंतू, शो रद्द असल्याचे सांगितल्यावर महिला पदाधिकाऱ्यांसह प्रेक्षकांनी त्याठिकाणी गोंधळ घालून जोरदार घोषणाबाजी केली. अखेर शो सुरू करण्यात येईल, असे जाहीर करताच गोंधळ शांत होऊन दुपारी १ वाजता शो सुरू करण्यात आला होता. घटनास्थळी शहर पोलिसदेखील दाखल झाले होते.

वादग्रस्त ठरलेला दशक्रिया या चित्रपटामुळे गेल्या दोन दिवसांपासून शहरातील वातावरण तापले आहे. शनिवारी नटवर मल्टिप्लेक्स व आयनॉक्स येथे जोरदार राडा झाला होता. पोलिसांच्या हस्तक्षेपानंतर वाद निवळला. मात्र, रविवारी (दि. १९) राष्ट्रवादी काँग्रेसच्या महिला पदाधिकारी कल्पना पाटील, प्रतिभा शिरसाठ, सविता बोरसे यांच्यासह विशाल राजू भाेसलेंसह तीस ते पंचवीस प्रेक्षकांनी दशक्रिया या चित्रपटाचे ऑनलाइन तिकीट काढले होते. त्यामुळे रविवारी दुपारी त्यांनी रिगल थिएटर गाठले व शो दाखविण्यास सांगितले. यावेळी थिएटरचे बुकिंग क्लर्क सतीश पाटील यांनी शो रद्द असल्याचे सांगितले. मात्र यावेळी पदाधिकाऱ्यांनी आम्ही शोचे तिकिट घेतले आहे, असे सांगून हा शो सुरू करण्यात यावा, तिकिट काढले आहेत, यासाठी राष्ट्रवादी महिला पदाधिकार्‍यांतर्फे जोरदार घोषणाबाजी करण्यात आली. अखेर दुपारी १ वाजेच्या सुमारास दशक्रिया चित्रपटाचा एक शो सुरू करण्यात आला. रिगल थिएटर येथे गोंधळ सुरू असल्याची माहिती मिळताच शहर पोलिस ठाण्याचे आशिष रोही यांनी थिएटर गाठत महिला पदाधिकाऱ्यांनी भेट घेतली व त्यांनी समजूत घातली. थिएटर परिसरात पोलिसांशी अरेरावी करणार्‍या एका तरूणाला पोलिसांनी ताब्यात घेतले होते. त्यानंतर त्याला सोडून देण्यात आले.