तरुणाचा मृत्यू; डॉक्टरांवर आरोप

म. टा. प्रतिनिधी, जळगाव

प्रकृती अस्वस्थ झाल्याने खासगी रुग्णालयात दाखल केलेल्या तरुणाचा काहीवेळातच मृत्यू झाल्याने डॉक्टरांनी चुकीच्या पद्धतीने उपचार केल्यामुळे मृत्यू झाल्याचा आरोप मृत तरुणाच्या कुटुंबीयांनी केला. त्यामुळे शासकीय रुग्णालय वैद्यकीय महाविद्यालयात मृताच्या नातेवाइकांनी संताप व्यक्त केल्याने रुग्णालयात बुधवारी (दि. १०) तणाव निर्माण झाला होता. संजय भिवसन गांगुर्डे (वय ३८) असे मृत तरुणाचे नाव आहे.

पिंप्राळा हुडको येथे राहणाऱ्या संजय भिवसन गांगुर्डे बुधवारी (दि. १०) सकाळी ८ वाजता गांगुर्डे अस्वस्थ वाटू लागले होते. त्यांना घाम येऊन ग्लानी येत असल्यामुळे कुटुंबियांनी सकाळी १० वाजता त्यांना नवाल हॉस्पिटलमध्ये दाखल केले. डॉक्टारांनी उपचार सुरू केल्यानंतर गांगुर्डे यांना एक इंजेक्शन दिले. यानंतर काही मिनीटातच गांगुर्डे बेशुद्ध झाले. त्यांची प्रकृती अधिक खराब झाल्यामुळे डॉक्टरांनी त्यांना दुसऱ्या रुग्णालयात हलवण्याचा सल्ला दिला. त्यानुसार गांगुर्डे यांना क्रिटिकल हॉस्पिटलमध्ये येथे दाखल करण्यात आले. तेथे तपासणी केली असता गांगुर्डे यांचा मृत्यू झाल्याचे डॉक्टरांनी सांगितले. यानंतर मृतदेह शासकीय वैद्यकीय महाविद्यालय व रुग्णालयात आणला होता. दरम्यान, नवाल हॉस्पिटल येथील डॉक्टरांनी चुकीचा उपचार केल्यामुळेच गांगुर्डे यांचा मृत्यू झाला, असा आरोप त्यांच्या पत्नी कल्पनाबाई यांनी केला आहे. दोषी असलेल्या डॉक्टरांवर कारवाई करण्यात यावी तसेच गांगुर्डे यांच्या मृतदेहाचे शवविच्छेदन इनकॅमेरा करण्याची मागणी कुटुंबीयांनी केली होती. या वेळी रुग्णालयात जिल्हापेठ पोलिस ठाण्याचे सहाय्यक पोलिस निरीक्षक संदीप अराक यांनी पथकासह धाव घेत गर्दी पांगवली. तसेच मृत गांगुर्डे यांच्या कुटुंबीयांची समजूत काढली. पोलिसांनी हस्तक्षेप करून गांगुर्डे यांचे शवविच्छेदन इनकॅमेरा करण्याचे पत्र रुग्णालयास दिले. त्यानुसार सायंकाळी ६ वाजता शवविच्छेदन करून मृतदेह कुटुंबीयांच्या ताब्यात देण्यात आला.