भुसावळ स्थानकाच्या विकासकामांना सुरुवात

जळगाव ः ​ भुसावळ रेल्वे स्थानकाच्या विकासकामांना सुरुवात करण्यात आली आहे. यासाठी रेल्वे परिसरातील बस स्थानकाचे पूर्वेकडील प्रवेशद्वार शनिवारी (दि. १२) सकाळी बंद करण्यात आले.

भुसावळ बसस्थानकात पूर्वेकडील प्रवेशद्वाराने बस स्थानकात प्रवेश करीत असत आणि दक्षिणेकडून बाहेर पडत असत. रेल्वे प्रशासनाने सुमारे दोन वर्षांपूर्वी रेल्वेच्या परिसरात पाइप व अँगल गाडल्याने पूर्वेकडील प्रवेशद्वारातून बसचा मार्ग बंद झाला होता. प्रशासनाने विनंती केल्यानंतर एका बाजूने हा मार्ग मोकळा करण्यात आला होता. पुन्हा तशीच स्थिती निर्माण झाल्याने याठिकाणी वाहतुकीची मोठ्या प्रमाणात कोंडी होणार आहे. डॉ. बाबासाहेब आंबेडकर चौक व बसस्थानक परिसरात नेहमीच कोंडी होत असते. विद्यालय सुटल्यानंतर त्यात अधिकच भर पडते. नगरपालिका आणि बसस्थानक प्रशासन यावर कोणता तोडगा काढते हे लवकरच समोर येणार आहे.