जन्म-मृत्यू विभागात कर्मचाऱ्यांमध्ये जुंपली

म. टा. प्रतिनिधी, जळगाव

महापालिकेतील जन्म-मृत्यू विभागात कमी कर्मचारी असल्याने कामांवरून वाद होण्याचे प्रमाण वाढले आहे. नागरिकांना वेळेवर दाखले मिळत नसतानाच गुरुवारी (दि. १२) कामादरम्यान भरणा कोण देणार यावरून कर्मचाऱ्यांमध्ये जोरदार शाब्दिक चकमक उडाली. अखेर याबाबत एका नागरिकाने चक्क महापौरांना कॉल करून ही माहिती दिली.

सतरा मजली इमारतीच्या तिसऱ्या मजल्यावर जन्म-मृत्यू विभाग आहे. या विभागातून जन्म व मृत्यूचे दाखले दिले जातात. गेल्या काही दिवसांपासून या विभागाबाबत नागरिकांच्या तक्रारी वाढत आहेत. वेळेवर दाखले न मिळणे, दाखल्यांमध्ये चुका करणे असे प्रकार नित्याचेच झाले आहेत. गुरुवारी, तर दुपारी नागरिक ताटकळत बसले असतांनाच विभागातील दोन कर्मचाऱ्यांमध्ये कामावरून जोरदार वाद झाल्याने गोंधळ निर्माण झाला. त्यानंतर एका नागरिकाने महापौर ललित कोल्हे यांना फोनवरून माहिती दिली. महापौर मुंबईला असल्याने त्यांनी मनसेचे नगरसेवक जोशी यांना सांगितल्यानंतर ते येथे आले मात्र तोपर्यंत वाद मिटला होता. या विभागात एकूण पंधरा जणांचा स्टाफ आहे. मात्र, डेंग्यूच्या साथ नियंत्रणासाठी पथकात येथील कर्मचारी घेतल्याने याठिकाणी केवळ तीनच कर्मचारी शिल्लक राहिले. महापौरांनी हे कर्मचारी पुन्हा येथे देण्यासाठी पत्र देवूनही प्रशासनाने कारवाई न केल्याचे नगरसेवक अनंत जोशी यांनी सांगितले.

महापौरांचा क्रमांक लागतो हॉटेलला

जन्म-मृत्यू विभागात नागरिकांना तक्रार करायची असल्यास महापौरांना फोन करा असा सूचनाफलक नुकताच लावण्यात आला आहे. मात्र या फलकावर महापौर यांच्या दालनातील लॅन्डलाइन क्रमांक देण्यात आलेला आहे. परंतु, हा क्रमांक चुकला असून, तो लावल्यास जळगावातील एका हॉटेलमध्ये लागतो अशी तक्रारही नागरिकांनी केली आहे. तरी हा क्रमांक काढून त्याठिकाणी खरा क्रमांक दिल्यास तक्रारी सोडवल्या जातील.