प्रकाशोत्सवाला सुरुवात!

आज धनत्रयोदशी; बाजारपेठेत उत्साह

म. टा. प्रतिनिधी, जळगाव

दिवाळी म्हणजे मांगल्याचा आणि प्रकाशाचा उत्सव. त्यासोबतच दिवाळी हा खरेदीचाही उत्सव झाला आहे. पूजेच्या साहित्याबरोबरच आता, इलेक्ट्रॉनिक वस्तू, वाहन खरेदीसह घर खरेदीला देखील दिवाळीचा मुहूर्त साधला जात आहे. दिवाळीनिमित्त शहरातील मुख्य बाजारपेठेच्या भागाला यात्रेचे स्वरूप प्राप्त झाले आहे. आज (दि. १७) धनत्रयोदशी शहरात साजरी होत असून, धनत्रयोदशीच्या पुजेसाठी आज (दि. १७) सायंकाळी ६:०१ ते ८:३२ असा मुहूर्त आहे.

दिवाळीनिमित्त शहरातील मध्यवर्ती बाजारपेठेत ग्राहकांची गर्दी वाढली आहे. महात्मा फुले मार्केट, सुभाष चौक, गोलाणी मार्केट व दाणा बाजार परिसरात सोमवारी प्रचंड गर्दी होती. टॉवर चौक ते थेट भिलपूरा चौकीपर्यंत रस्त्याच्या दुतर्फा तसेच दुभाजकावर या विक्रेत्यांनी आपली दुकाने थाटली होती. यामुळे या रस्त्यावर चालणेदेखील अवघड झाले होते. धनत्रयोदशी असल्यामुळे पूजेचे साहित्य, फराळ, मिठाई, खरेदीसाठी बाजारात मोठी गर्दी झाली होती. सकाळपासून टॉवर चौकातून घाणेकर चौका पर्यंतच्या अवघ्या काही मिनिटांच्या अंतरासाठी वाहनधारकांना तब्बल अर्धा तास लागत होता.