डॉक्टर हत्येत सहा जणांचा सहभाग?

पोलिसांकडून प्रत्यक्षदर्शींची चाचपणी

म. टा. प्रतिनिधी, जळगाव

सिव्हिल हॉस्पिटलमधील जिल्हा कुष्ठरोग विभागाचे प्रमुख तथा आरोग्य सेवा विभागाचे सहाय्यक संचालक डॉ. अरविंद मोरे यांची पार्वती नगरातील घरात गळा चिरून हत्या करण्यात आली. सोमवारी (दि. ११) पहाटे पावणे दोन वाजता त्यांच्या घराजवळ काही जणांनी एका विनानंबरच्या दुचाकीसह सहा अनोळखी लोकांना पाहिल्याची व डॉक्टरांच्या किंकाळ्या ऐकल्याची धक्कादायक माहिती तपासामध्ये समोर येत आहे. त्यानुसार पोलिसांकडून या प्रत्यक्षदर्शींची चाचपणी केली जात असल्याचे विश्वसनीय वृत्त आहे.

गिरणा टाकीजवळील असलेल्या पार्वती नगर रस्त्यावरच प्लॉट क्र.३ वर असलेले जे. एन. पाटील यांच्या श्रीराम नामक घरात वरच्या मजल्यावर डॉ. अरविंद सुपडू मोरे (वय ५२, मूळ रा. नाशिक) हे भाड्याने राहत होते. मागील तीन महिन्यांपूर्वीच त्यांची जळगाव येथे बदली झाली होती. काल त्यांचा मृतदेह घरातच आढळून आला होता. पोलिसांकडून याचा तपास सुरू असतानाच आता हत्येची घटना परिसरातील काही जणांनी पाहिल्याचे समोर येत आहे. याबाबत पोलिसांनीही चाचपणी सुरू केली आहे.

डॉक्टर मोरे यांचा खूनच झाल्याची पुष्टी शवविच्छेदन अहवालात करण्यात आली आहे. डॉक्टरांच्या हातावर एक जखम आढळली असून, ती झटापटीत झाल्याचा अंदाज आहे. तसेच नाशिक येथील फॉरेन्सिक टीमदेखील मृतदेहाजवळील रक्तात आढळलेल्या पावलांच्या ठश्यांचे विश्लेषण करीत आहे. यासह मृत डॉक्टर मोरे यांच्या दोन्ही मोबाइलमधील सीडीआरचाही अभ्यास करण्यात येत असल्याची माहिती पोलिस सूत्रांकडून मिळाली आहे. या घटनेच्या काही दिवसांपूर्वी डॉ. मोरे यांच्या त्यांच्या घरासमोरच काहीजणांनी वाद घातला होता, त्यांचे हे अनेकांनी पाहिलेसुद्धा होते.