नालेसफाईवरून पदाधिकारी आक्रमक

आमदारांसह विरोधीपक्ष नेत्यांनी घेतली आयुक्तांची भेट

म. टा. प्रतिनिधी, जळगाव

पावसाळा अवघ्या महिन्यावर येवून ठेपला असतानादेखील महापालिका प्रशासनाकडून मुख्य नाल्यांच्या सफाईला सुरुवात झाली नसल्याने आमदार सुरेश भोळे यांच्यासह विरोधीपक्ष नेते सुनील महाजन यांनी आयुक्त डॉ. उदय टेकाळे यांची भेट घेवून चर्चा केली. या वेळी आयुक्तांनी मक्तेदारांकडून जेसीबी व डंम्पर भाड्याने घेवून तत्काळ नालेसफाईस सुरुवात करण्यात येईल, असे आश्वासन दिले. रविवारी ‘मटा’मध्ये ‘पावसाळापूर्व नियोजनाचा बोजवारा’ या मथळ्याखाली नालेसफाईबाबत वृत्त प्रकाशित करण्यात आल्याने पदाधिकारी व प्रशासनाला जाग आली आहे.

शहरात २३ किमी. लांबीचे पाच मोठे नाले असून, या पाच प्रमुख नाल्यांसह ७० उपनाले आहेत. सफाईच्या मोहीम पावसाळ्यापूर्वी केली जाते. या नाल्यामधील सर्व गाळ व कचरा काढून नाल्याचा प्रवाह मोकळा करण्याचे काम पावसाळ्यापूर्वी दोन महिने आधीपासून करण्यात येते. मात्र, पावसाळा एक महिन्यावर असतानादेखील शहरातील मुख्य नाल्यांच्या सफाईचे काम सुरू झालेले नाही. पावसाळ्यात अतिवृष्टी झाल्यास नाले तुंबून परिसरांमध्ये पाणी घुसण्याचा धोका निर्माण झाला आहे. याबाबत सोमवारी (दि. १३) मनपाचे विरोधीपक्ष नेते सुनील महाजन यांची नालेसफाईबाबत दुपारी भाजपचे आमदार सुरेश भोळे यांची भेट घेतली. नालेसफाई केली जात नसल्याबद्दल त्यांनी प्रशासनाविरोधात संतापदेखील व्यक्त केला. त्यानंतर आमदार भोळे व सुनील महाजन यांनी आयुक्त डॉ. उदय टेकाळे यांची त्यांच्या दालनात जावून भेट घेत नालेसफाई का सुरू केली नाही, असा प्रश्न विचारला.

मक्तेदारांची उदासीनता
मुख्य नालेसफाईसाठी चारही प्रभांगासाठी निविदा काढून जेसीबी व डंम्पर भाड्याने घेवून सफाईच्या सूचना आयुक्तांनी अधिकाऱ्यांना दिल्या होत्या. मात्र, प्रशासनाने महिनाभरानंतर निविदा काढल्याने संताप व्यक्त होत आहे. मनपा निधीतून बिले मिळत नसल्याने मक्तेदार काम करण्यास उदासीन असल्याचे सांगितले जात आहे. त्यामुळे आयुक्तांनी नालेसफाईची बिले वेळेवर देण्याचे सांगत लगेचच कामांना सुरुवात करणार असल्याचे आश्वासन आमदार भोळे व महाजन यांना दिले.