गैरसमजाने तरुणांना मारहाण

म. टा. प्रतिनिधी, जळगाव

मित्राच्या बहिणीला मोबाइलवर संदेश पाठवून भेटायला येणारा तरुण समजून भुसावळच्या दोघांना बेदम मारहाण केल्याची घटना गुरुवारी घडली. शहरात ७ ते ८ तरुणांनी दुपारी ४ वाजेच्या सुमारास खान्देश सेंट्रल मॉलमध्ये या तरुणाला मार खावा लागला.

जळगाव शहरातील एका गटातील मित्राच्या बहिणीसोबत एक तरुण काही दिवसांपासून सोशल मीडियावर चॅटिंग करीत होता. त्या तरुणाने काळा शर्ट, काळी पॅन्ट आणि काळी टोपी घालून बिगबाजारात भेटण्यासाठी येणार असल्याचा संदेश त्याने पाठविला. नेमकी तिच चॅटिंग तरुणीच्या भावाने वाचली होती. दरम्यान, दुपारी ४ वाजेच्या सुमारास चित्रपट पाहून घरी जात असलेले भुसावळ येथील दोन तरुण तिकीट काऊंटरजवळ उभे होते. त्यांनी काळा टी-शर्ट, पॅन्ट आणि काळी टोपी परिधान केली होती. या गटाला त्या तरुणांवर संशय आल्याने त्यांनी दोघांना चोप दिला. तरुणांनी भुसावळच्या दोघांना बदडल्यानंतर त्यांचा मोबाइल हिसकावला. मोबाइलमधील चॅटिंग तपासली असता बहिणीसोबत चॅटिंग करणारा हा नसल्याची त्यांची खात्री पटली. तेव्हा मार खाणाऱ्या तरुणांनी आक्रमक भूमिका घेतली. दरम्यान, या वादाची माहिती मिळताच शहर पोलिस ठाण्याचे कर्मचारी मोहसीन बिराजदार त्या ठिकाणी पोहचले. मात्र, तोपर्यंत मारहाण करणाऱ्या सर्वांनी पळ काढला होता. खान्देश सेंट्रलच्या आवारातील सीसीटीव्ही फुटेज तपासून मारहाण करणाऱ्या चौघांना ठाण्याचे प्रीतम पाटील यांनी ताब्यात घेतले.