ट्रकच्या चाकाखाली आल्याने दुचाकीस्वाराचा जागीच मृत्यू

खड्ड्यांमुळे गमाविला जीव

म. टा. प्रतिनिधी, जळगाव

शहरातील नेरी नाक्याकडून चित्रा चौकाकडे येणाऱ्या रस्त्यावरील खड्ड्यात शनिवारी (दि. १४) सायंकाळी ६ वाजता अनिल श्रीधर बोरोले यांची दुचाकी घसरून खाली पडले. याचवेळी बाजूने जात असलेल्या ट्रकच्या मागच्या चाकाखाली आल्याने त्यांचा जागीच मृत्यू झाला.

अपघातात मृत झालेल्या अनिल बोरोले (वय ६७, रा. जुनी पोस्टल कॉलनी) यांची एमआयडीसीतील इ-सेक्टरमध्ये निरंजन ट्रान्स इलेक्ट्रिकल नावाची कंपनी आहे. या कंपनीत इलेक्ट्रिक कंट्रोल पॅनल तयार होतात. दरम्यान, शनिवारी (दि. १४) कंपनी बंद असल्यामुळे बोरोले खासगी कामानिमित्त दुचाकीने (एमएच १९ डीबी ४०४८) घराबाहेर पडले. सर्व कामे आटोपून चित्रा चौकातील नारायण इलेक्ट्रिकलसमोरून अनिल बोरोले हे शनिवारी सायंकाळी ६ वाजता जात होते.

चित्रा चौकाकडे येताना रस्त्यातील एका खड्ड्यात त्यांच्या दुचाकीचे पुढचे चाक गेल्यामुळे त्यांचे संतूलन बिघडून उजव्या बाजूला पडले. या वेळी शेजारून ट्रक (एमएच ०४ डीडी ६४५३) जात होता. त्या ट्रकची मागील चाके अनिल बोरोले यांच्या डोक्यावरून गेल्याने त्यांचा जागीच मृत्यू झाला. वाहतूक शाखेचे पोलिस निरीक्षक देविदास कुनगर, कर्मचाऱ्यांनी खिशातील कागदपत्रांवरुन बोरोले यांची ओळख पटवली. यानंतर कुटुंबीयांना माहिती देण्यात आली. काही वेळाने मृतदेह शासकीय वैद्यकीय महाविद्यालय व रुग्णालयात नेला होता. रात्री उशिरापर्यंत ट्रकचालकाविरुद्ध गुन्हा दाखल करण्याचे काम सुरू होते. थोड्या वेळात घरी पोहोचतो असा निरोप त्यांनी फोनवरून घरी दिला होता. दरम्यान, ही घटना झाल्यानंतर या रस्त्यावर वाहतूक कोंडी झाली होती. आमदार सुरेश भोळे यांनीही या वेळी घटनास्थळी भेट दिली. ते याच रस्त्यावरून जात होते. काही नागरिकांनी खड्डे दुरुस्ती न केल्यानेच बोरोल यांचा बळी गेल्याचे सांगत प्रशासनावर आपला संताप व्यक्त केला.