पिंप्राळा भागात मशिनद्वारे धुरळणी

म. टा. प्रतिनिधी, जळगाव

पिंप्राळा भागात गेल्या काही दिवसांत डासांचा प्रादूर्भाव वाढल्यामुळे डेंग्यू किंवा डेंग्यूसदृश आजारांचे रुग्ण वाढले आहेत. याची दखल घेत नगरसेवक अमर जैन यांनी रविवारी (दि. २४) पिंप्राळा भागातील वसाहतींमध्ये कीटकनाशकाची धुरळणी करून घेतली.

महापालिकेच्या आरोग्य विभागाकडून दोन फॉगिंग मशिन आणून ही धुरळणी करण्यात आली. यावेळी जितेंद्र पाटील, पंकज पाटील, शैलेश पाटील व बंटी राजपूत उपस्थित होते. अष्टभूजा देवी परिसर, साईबाबानगर भागात सकाळपासून दुपारपर्यंत धुरळणी सुरू होती. या परिसरात तापाचे रुग्ण असल्याचे अनेकांनी यावेळी सांगितले. त्यामुळे घरांच्या कानाकोपऱ्यात धुरळणी करण्याचा आग्रह नागरिकांनी केला होता. पिंप्राळा परिसरात सर्वत्र धुरळणी करू असे नगरसेवक अमर जैन म्हणाले. पिंप्राळा परिसरातील धुरळणीची पाहणी महापौर ललित कोल्हे व खाविआ गटनेते सुनील महाजन यांनी केली.