‘उमवि’चा निवडणूक कार्यक्रम जाहीर

एकूण सोळा जागांवर १७ सप्टेंबरला मतदान

म. टा. प्रतिनिधी, जळगाव

उत्तर महाराष्ट्र विद्यापीठाच्या अधिसभेवर व्यवस्थापन प्रतिनिधींमधून सहा आणि प्राचार्यांमधून दहा जागा निवडून देण्यासाठी निवडणूक कार्यक्रम बुधवारी (दि. २६) जाहीर करण्यात आला आहे. प्रभारी कुलसचिव तथा निवडणूक निर्णय अधिकारी प्रा. ए. बी. चौधरी यांनी हा निवडणूक कार्यक्रम जाहीर केला.

उत्तर महाराष्ट्र विद्यापीठाच्या अधिसभेवर व्यवस्थापन प्रतिनिधींमधून सहा आणि प्राचार्यांमधून दहा जागा या निवडणुकीद्वारे निवडून दिल्या जाणार आहेत. बुधवारी, प्राचार्य आणि व्यवस्थापन प्रतिनिधी यांची प्राथमिक मतदार यादी जाहीर करण्यात आली आहे. या यादीतील नावांमधील बदल अथवा आक्षेप नोंदविण्यासाठी दि. ३१ जुलै, सायंकाळी ५ वाजेपर्यंतची मुदत देण्यात आली आहे. त्यानंतर दि. २ ऑगस्टला सुधारित यादी विद्यापीठाच्या संकेतस्थळावर आणि नोटीस बोर्डावर प्रसिद्ध करण्यात येणार आहे, अशी माहितीही निवडणूक निर्णय अधिकारी प्रा. ए. बी. चौधरी यांनी दिली.

असा असेल निवडणूक कार्यक्रम

या सुधारित यादीवर दि. ७ ऑगस्ट सायंकाळी ५ वाजेपर्यंत कुलगुरूंकडे अपिल करता येईल. तर दि. ९ ऑगस्टला कुलगुरू या अपिलावर निर्णय देतील. यानंतर दि. १० ऑगस्ट रोजी अंतिम मतदार यादी प्रसिद्ध केली जाणार आहे. तर दि. १६ ऑगस्टला निवडणूक सूचना प्रसिद्ध होणार आहे. या निवडणुकीसाठी दि. २४ आणि २५ ऑगस्ट सायंकाळी ५ वाजेपर्यंत नामनिर्देशन अर्ज दाखल करता येतील. दि. २६ ऑगस्टला अर्जांची छाननी होऊन अर्जांची यादी विद्यापीठाच्या संकेतस्थळावर आणि नोटीस बोर्डावर प्रसिद्ध होईल. यानंतर दि. २८ ऑगस्ट रोजी सायंकाळी ५ वाजेपर्यंत उमेदवारी अर्ज मागे घेण्याची अंतिम मुदत आहे. माघारीनंतर दि. ३१ ऑगस्ट रोजी निवडणूक लढवणाऱ्या उमेदवारांची यादी घोषित होणार होऊन दि. १७ सप्टेंबरला सकाळी ८ ते सायंकाळी ५ वाजेदरम्यान मतदान होणार आहे. दि. १९ सप्टेंबर रोजी सकाळी १० वाजता मतमोजणीला प्रारंभ होऊन निकाल जाहीर केला जाणार आहे. यासंदर्भात विद्यापीठाच्या www.nmu.ac.in या

संकेतस्थळावरील www.nmu.ac.in/election या पोर्टलवर, विद्यापीठाच्या नोटीस बोर्डावर अधिसूचना प्रसिद्ध करण्यात आली आहे, अशी माहिती प्रा. ए. बी. चौधरी यांनी दिली.