​ फुले मार्केटने घेतला मोकळा श्वास

म. टा. प्रतिनिधी, जळगाव

बऱ्याच दिवसांपासून हॉकर्सच्या अतिक्रमणाचा विळखा पडलेल्या महात्मा फुले मार्केटमध्ये बुधवारी अतिक्रमण निर्मूलन मोहीम राबविण्यात आली. याबाबतचा इशारा मंगळवारीच विक्रेत्यांना देण्यात आल्याने पथक पोहोचण्यापूर्वीच हॉकर्सने पेट्या, डिस्प्ले व बांधलेले पाल काढून शिस्तीत स्टॉल मांडले होते. त्यामुळे फुले मार्केटचे अंतर्गत रस्ते मोकळे झाले होते.

शहरातील मध्यवर्ती परिसरातील महात्मा फुले व सेन्ट्रल फुले मार्केटमध्ये महापालिकेने गेल्या सहा महिन्यांपूर्वी गाजावाजा करीत अतिक्रमण निर्मूलन मोहीम राबविली होती. मात्र दुसऱ्या दिवासापासून याठिकाणी जैसे थे परिस्थिती झाली होती. हॉकर्सला केवळ ४ बाय ६ इतक्याच जागेत स्टॉल लावणे बंधनकारक असताना त्यांनी मोठ्या पेट्या व दोन हातगाड्या लावून त्यावर पाल बांधले होते. डिस्प्लेदेखील लावल्याने या ठिकाणी पायी चालण्यास जागा राहिली नव्हती. याबाबत आलेल्या तक्रारीनुसार आयुक्त जीवन सोनवणे यांनी अतिक्रमण निर्मूलनचे अधीक्षक एच. एम. खान यांना बुधवारी फुले मार्केटमधील अतिक्रमण हटविण्याच्या सूचना दिल्या होत्या. अतिक्रमण पथकाने मंगळवारी रात्रीच हॉकर्सला कारवाईचा इशारा दिला होता. बुधवारी सकाळी ११ वाजता महापालिकेची दोन वाहने व अतिक्रमण निर्मूलन पथक फुले मार्केटमध्ये पोहोचले. मात्र, हॉकर्सने मोहिमेचा धसका घेऊन आधीच शिस्तीत स्टॉल थाटले होते. तसेच बांधलेले पाल, डिस्प्ले काढून टाकले होते. त्यामुळे फुले मार्केटचे अंतर्गत रस्ते मोकळे झाले होते. काही विक्रेत्यांनी जास्त जागा व्यापलेली असल्याने त्यांचे सामान जप्त करण्यात आले. यावेळी हॉकर्स व अतिक्रमण निर्मूलन पथकात बाचाबाची झाली.