हॉकर्सकडून कर्मचाऱ्यास मारहाण

अतिक्रमण निर्मूलनप्रसंगी चौबे शाळेजवळ गोंधळ

म. टा. प्रतिनिधी, जळगाव

जळगाव शहरातील सुभाष चौक रस्त्यावर गुरूवारी (दि. ३१) महापालिकेच्या अतिक्रमण निर्मूलन विभागाकडून अतिक्रमण निर्मूलन मोहीम सुरू होती. चौबे शाळेजवळील गल्लीत नो हॉकर्स झोनमध्ये बटाटे विक्रेत्याचे साहित्य जप्त करत असताना वाद झाला. या वादाचे रुपांतर बाचाबाचीत होवून विक्रेत्याकडून पथकातील कर्मचाऱ्यास तराजूने मारहाण केल्याने तणाव निर्माण झाला होता. ही घटना गुरुवारी सकाळी सव्वा अकरा वाजता घडली. पोलिसांनी मध्यस्थी केल्याने वादावर पडदा पडला.

ख्वाँजामिया झोपडपट्टीच्या जागेवर तात्पुरत्या स्वरुपात शहरातील बळीराम पेठ, सुभाष चौक, शिवाजी रोडवरील ७८२ हॉकर्सना जागा देवून स्थलांतर प्रक्रिया पूर्ण करण्यात आली. याठिकाणी अनेक हॉकर्स गेले असून, काही हॉकर्सना स्थलांतर मान्य नसल्याने सुभाष चौक, शिवाजी रोड, बळीराम पेठेतील मुळ जागेवरच बसतात. गुरुवारी सकाळी भाजीपाला व फळ विक्रेत्यांनी बाजारपेठेत दुकाने थाटली होती. अतिक्रमण निर्मूलन विभागाचे वाहन सकाळी ११ वाजता साने गुरुजी पुतळ्याजवळून येताना दिसताच हॉकर्समध्ये पळापळ सुरू झाली. अनेक हॉकर्सनी हातगाड्या परिसरातील गल्ल्यांमध्ये नेल्या. पथक येताच भजे गल्लीतील अतिक्रमण धारकांमध्ये धावपळ उडाली.