'आमदार भोळेंकडून अतिक्रमणात अडथळा'

नगरसेवक अनंत जोशी यांचा पत्रकार परिषदेत आरोप

म. टा. प्रतिनिधी, जळगाव


सर्वोच्च न्यायालयाच्या निर्देशानुसार स्थापन करण्यात आलेल्या रस्ता सुरक्षा समितीच्या आदेशाने रस्ते मोकळे करण्याचे काम प्रशासनाने हाती घेतले आहे. त्यासाठी हॉकर्सधारकांना पर्यायी जागा देऊन स्थलांतरीत केले जात आहे. या कार्यवाहीत आमदार सुरेश भोळे हे हॉकर्सची माथी भडकविण्याचे काम करत असल्याचा आरोप नगरसेवक अनंत जोशी यांनी शनिवारी पत्रकारांशी बोलताना केला.
अडचणीच्या रस्त्यांवरील हॉकर्सधारकांना पर्यायी जागा देऊन स्थलांतरीत करण्याची मोहिम प्रशासनाने हाती घेतली आहे. अतिक्रमण काढण्याआधी हॉकर्ससाठी पर्यायी व्यवस्था करावी. तसेच भेदभाव न करता, पर्यायी हॉकर्स झोन ठरवून देण्यात यावे, अशा आशयाचे पत्र आमदार भोळे हे आयुक्तांना देतात. तर दुसरीकडे हॉकर्सची बाजूदेखील घेतात. यामुळे आमदार भोळे यांची ही दुटप्पी भूमिका असल्याचेही जोशी यांनी सांगितले. उपमहापौर ललित कोल्हे आणि अनंत जोशी यांच्यामुळेच होत असल्याचे काही लोकप्रतिनिधी प्रचार करीत असल्याचेही जोशी यांनी सांगितले.