सिलिंडर स्फोटात तिघांचा मृत्यू

अंतुर्ली गावाजवळील घटना; एक गंभीर जखमी

म. टा. वृत्तसेवा, रावेर

मुक्ताईनगर तालुक्यातील अंतुर्लीजवळील शहापूर फाट्यावर लुकमान फ्रूट कंपनीच्या केळी रायपनिंग चेंबर (केळी पिकविण्याचे शीतगृह) मध्ये झालेल्या सिलिंडर स्फोटात तीन जणांचा जागीच मृत्यू झाला. तर एक गंभीर जखमी झाला आहे. घटनेतील जखमीस बऱ्हाणपूर येथील रुग्णालयात दाखल करण्यात आले. घटनास्थळी पोलिसांनी दाखल होत तपासाला सुरुवात केली आहे. अप्पर पोलिस अधीक्षक बच्चनसिंह, खासदार रक्षा खडसे यांनी उशिरा घटनास्थळी भेट दिली.

अंतुर्ली गावात बुधवारी दुपारी १ वाजेच्या दरम्यान शहापूर फाट्यावर लुकमान फ्रूट कंपनीच्या शीतगृहाबाहेर अचानक इथिलीन गॅस सिलिंडरचा स्फोट झाला. या वेळी त्या ठिकाणी उभ्या असलेल्या शिवाजी साळुंके (रा. अंतुर्ली), शेख शरीफ शेख खानू मन्यार (रा. रसलपूर ता. रावेर), निवृती पाटील (रा. वायली मध्य प्रदेश, ह. मु. रावेर) यांचा जागीच मृत्यू झाला. तर शेख हनीफ शेख हमीद हे गंभीर जखमी झाले आहेत.

दरम्यान, केळी पिकवण्याच्या कोल्ड स्टोरेजसाठी इथिलीन सिलिंडरचा वापर होत असतो. हा स्फोट इतका जोरात होता की, यात शीतगृहाच्या दोन खोल्यांची प्रचंड नासधूस होऊन लांब अंतरावर सिलिंडरचे अवशेष फेकले गेले. येथे उभ्या दुचाकी व रिक्षाचेही नुकसान झाले आहे. घटनेची माहिती मिळताच मुक्ताईनगरचे पोलिस निरीक्षक अशोक कडलग हे सहकाऱ्यांसह घटनास्थळी दाखल झाले. दरम्यान, हे कोल्ड स्टोरेज शेख लुकमान शेख ईस्माईल यांच्या मालकीचे आहे. कृषी योजनेंतर्गत हा केळी पिकविण्याचा प्रकल्प २०१५ मध्ये सुरू करण्यात आला होता. घटनेप्रकरणी आकस्मिक मृत्यूची नोंद करण्यात आली असून, पुढील तपास पोलिस करीत आहेत.